政務SEE｜謝偉俊下架FB專頁 審核尖銳批評政府言論 「非為散播恐慌」

《基本法》23條實施咗唔夠一個星期，資深嘅立法會議員謝偉俊已經悄悄下架Facebook專頁。《信報》政情專欄余錦賢話，阿Paul要審視以往發表嘅帖文會唔會「太尖銳」，甚至引起「煽動」嘅聯想，要刪除敏感內容先重新上線喎。吓，話晒阿Paul都係「愛國愛港」議員，都要自我審查？阿Paul就同阿絲講，唔係想散播恐慌，但帖文俾讀者睇到，或者被視為持續發佈喎。

立法會討論23條立法時，律政司司長林定國曾經講過，「煽動意圖罪」絕不阻礙任何人對政府政策有反對意見，仲話「無論表達幾激烈，一啲問題都冇」。

不過，本身係律師嘅謝偉俊日前主動將Facebook專頁下架。佢話擔心以往發表有關「小紅書治港」嘅帖文會被人借題發揮，變成「煽惑族群矛盾」，不如暫時下架先，等檢視所有帖文，刪除敏感內容後再重開。佢又記得喺議會質詢政府時，曾被特首話用詞令人聯想到「黑暴」。

阿絲聽到呢個消息後，都好關心阿Paul，咁要check幾耐先重開專頁呀？佢話呢個專頁用咗好多年，恐怕需要一段時間審核，主要檢視目標係較尖銳批評政府言論，暫時未能確定有幾多帖文受影響喎，睇嚟大家都有一排睇唔到阿Paul喺專頁點評時事喇。

不過，作為愛國愛港立法會議員都要謹慎檢視帖文，會唔會俾外界一個信號，令公眾更加擔心過去言論被追究？阿Paul話，23條立法前上載嘅帖文，一旦讀者繼續上網睇到或下載，或者可被視為持續發佈，同收埋「違法」參考資料及史料喺屋企或辦公室唔同，要較審慎處理。

阿Paul強調，審查目的唔係為散播恐慌，作為律師就要更加審慎，亦希望避免政治立場唔同人士引用帖文，作為攻擊政府、23條立法或整體建制陣營藉口。

咁一般市民點算呢？阿Paul話「因人而異，恐怕要各自檢討了」。

陳弘毅：市民最需要留意煽動罪

23條嘅煽動罪究竟會點影響大眾呢？《明報》今（27日）刊登港大法律學院憲法學講座教授陳弘毅文章，佢話整部23條中，市民可能最需要留意嘅係煽動罪嘅條文，現時23條將煽動罪嘅最高刑罰由2至3年提高到7年。

陳弘毅解釋，基本上對政府體制或政府政策嘅「建設性批評」和「改良建議」，係唔會構成煽動罪。煽動罪主要是指煽動對國家、政府、立法機關或法院嘅憎恨或藐視，或煽動唔同社群之間嘅憎恨或敵意。

究竟日後尖銳批評會唔會愈嚟愈少？阿絲不禁諗起近年網上流傳嘅金句「如果尖銳的批評完全消失，溫和的批評將會變得刺耳。如果溫和的批評也不被允許，沉默將被認為居心叵測」。