政務SEE｜《小紅書》評香港最差五大地區 批日出康城係「港版加沙地帶」

政府成日話「說好香港故事」，住喺香港嘅人又點睇香港呢？最近有《小紅書》用戶聲稱綜合網民留言，列出香港五大居住環境最差嘅地區，港島中半山豪宅區竟然排名第五差，而較受年輕家庭歡迎嘅日出康城更加名列榜首，仲俾人形容係「港版加沙地帶」！

《小紅書》用戶「里昂Leon」發文分析香港各區嘅居住環境，整理出最差嘅五大地區。排第一嘅係將軍澳日出康城，被狠批係「港版加沙地帶」，仲細數一堆壞處：「將軍澳，人太多，好像大型監獄咁，平常返工已經很累，下班回家仍然跟別人逼」、「從上班出門那一刻到下班回到家，感覺自己是一顆社會齒輪，港鐵和巴士就是兩條輸送帶」、「還有附近堆填區的臭味」。

阿絲睇返資料，根據2021年人口普查數字，康城係將軍澳區內最「有錢」嘅地區，2021年家庭月入中位數超過6萬蚊，高過全港中位數27,650蚊1.1倍。但人哋眼中嘅「加沙地帶」吸引愈嚟愈多人住喎，2021年康城總人口升到46,755人，較2016年30,575人急升53%。

而第二名係深水埗，貼文批評深水埗品流複雜，「附近很多公屋，大量南亞裔、拾荒老人家和神智失常的人，晚上9點後的小巷都是人間禁地」、「超過十點後都不敢出門」。阿絲心諗，人間禁地又誇張咗，夜晚9點後邊個咁無聊特登行入小巷呀？

排第三嘅係觀塘安達臣道，位於係觀塘區同西貢區嘅分界線，鄰近秀茂坪、順利邨。貼文話，安達臣道位於山腰上，地理位置同交通都極之唔方便：「去觀塘市中心都堵半個鐘，20層地獄超長垂直電梯」，又話附近「全都是建築工地，塵土飛揚」。

講到交通唔方便，第四位係新界北區，貼文批評上水、粉嶺位置太偏遠：「坐車出九龍太浪費時間，自己開車又容易遇到堵車情況，區內只有幾個小商場」。又話北區地理位置鄰近中國，日常生活都有大量中國人，感覺「脫離香港生活」咁話喎。嘩！你咁講法，而家係咪歧視中國人先？

不過最令阿絲「跌眼鏡」嘅係第五名，港島中半山區居然榜上有名！港島半山區出咗名係有錢人住嘅地方，話自己住喺半山都算係個「身分象徵」吖。貼文就唔係咁睇喇，話「完全不明白那些人那麼迷戀中半山，每天都堵車，半夜回家試過遇到野豬」，仲嫌半山無宵夜選擇，更加有人話「週末叫車要等很久」、搭的士要加錢，去銅鑼灣都要加50蚊。其實住得半山，唔少人有司機接送，邊駛叫車、搭的士呀？

呢篇貼文喺《小紅書》引起熱烈討論，有人話康城「罪不至此」，雖然地鐵班次比較少，但環境尚算唔錯。亦都有人為中半山平反，「不喜歡中半山的都在酸吧，住半山就知那裏多方便」，又有人提議其他地方都應該上榜，「馬鞍山竟然沒有上榜，出了名的美食荒漠」。

香港網民又同唔同意佢哋嘅評價呢？有網民回應話：「以為康城日日有飛彈」、「邊度好？ 區區都係咁㗎啦」、「逼就係因為太多你呢啲支殖民」、「對窮人（嚟講）中半山真係差」。阿絲就覺得，無論住喺邊，心安之處先係家啦。就算香港居住環境比較擠迫，總好過身處喺加沙地帶嘅人，喺戰火中流離失所吖。