政務SEE〡30年冇加水費 《大公》籲勿忘東江水「極平、極優質」

近30年冇加過嘅水費近期醞釀加價喎，水務署署長黃恩諾話希望「循序漸進」加水費。《大公報》政治專欄「井水集」今日（3日）為加價護航，仲提醒市民，香港之所以30年唔使加水費，一大關鍵原因就係東江水「數十年來如一日……以極低的費用提供極穩定、極優質的水源」。對國家恩情，阿絲當然「未敢忘記」；只不過，對於東江水嘅水價，阿絲又真係「唔想記起」喎。

千億財赤當前，「財爺」喺今年《預算案》講明，要檢討長期冇調整、又遠遠未收返成本嘅公共項目收費，由1995年起未加過嘅水費自然成為目標。今年新上任嘅水務署署長黃恩諾接受《星島日報》專訪，話水務署嚿年蝕咗24億元，未來希望「人性化、溫和及循序漸進」去調整水費。

黃署長仲話，今年4月成立咗外展隊，已經接觸咗餐飲業、洗衣業代表，之後仲會同食品加工業、美容業、酒店業同建造業團體見面。佢話完全聽到社會希望加幅「接地氣」、「唔好咁辣」嘅聲音。

《大公報》政治專欄「井水集」今日用「廉價水費的背後」為題，引述水務署數據，話早喺1998年，水務經營賬已經錄得虧損。隨住生產成本不斷上升，「加上購水、食水處理、供水設施維修」，如果再唔加價，水務署嘅「財務水錶」恐怕要「爆錶」嘞。

專欄之後就話，香港之所以能夠長期維持低水費，除咗政府補貼之外，其中一個關鍵原因，就係中國「內地數十年來如一日，確保東江之水源源不絕供港，香港才可以無後顧之憂」。文章仲要市民「切不可忘記」，東江水是用「極低的費用提供極穩定、極優質的水源，以及高質量的供水服務」。

3年要價157.7億元 水價貴澳門1倍 深圳5倍

阿絲唔會忘記嘅，仲有東江水嘅水價。喺嚿年12月，香港同廣東省政府簽咗新一份由今年至2026年嘅買東江水協議，水價喺未來三年每年加價2.39%，3年加埋就要用157.7億港元嘞。當時《光傳媒》做過比較，以今年東江水價每立方米約6.26元計，比澳門買西江水每立方米3.06元貴一倍；比深圳、東莞更加貴5倍𠻹。

其實今屆立法會都曾經討論過，點解供港東江水價比其他廣東省城市貴咁多。立法會文件引述廣東省政府話，因為省內城市要起供港嘅供水設施，所以要付出昂貴嘅土地資源，仲話呢啲城市「為水支付的代價實際上遠大於香港所付出的相關代價」。都咪話唔感動，睇到阿絲有啲眼濕濕𠻹。