政務SEE〡李鎮強比喻選民登記：一剎那的決定，談戀愛一樣

唔知各位讀者記唔記得18歲成年，第一件事係做咩呢？今日（18日）立法會傾「2024年選民登記運動」，多名議員提議政府向年輕朋友多做宣傳，等佢哋一到18歲換身份證就登記做選民。選委界別議員李鎮強更加妙語如珠，將選民登記比喻為談戀愛，形容都係「一剎那的決定」，成件事有冇即刻變得浪漫？唔知遲啲登記做選民係咪有花收呢？

立法會政制事務委員會今日傾選民登記運動，選舉事務處話今年會加強對目標群體嘅宣傳，特別係啱啱年滿18歲、取得永久性居民資格嘅人。當局計劃喺入境處設立櫃位，鼓勵同協助去換身份證嘅人登記；又會寄申請表格到大學同中學，同埋喺專上院校設流動登記站。

除此之外，政府仲話會針對唔同專才計劃到香港嘅新來港人士，鼓勵佢地取得永久性居民身份後，登記成為選民。

回憶18歲 簡慧敏完成兩件事

政府咁重視年輕人投票率，阿絲睇返2021年「完善」咗嘅立法會選舉，18至20歲嘅「首投族」投票率低至6.6%，21至25歲組別的投票率錄得最低嘅6.36%，同2016年立法會選舉超過5成投票率差距極大。

有議員發言期間不禁回想當年，選委界別議員簡慧敏話自己18歲係「好多年前㗎啦」，不過依然好記得做咗兩件好重要嘅事，「一件就係登記做選民，第二件就考車牌」，佢仲希望政府宣傳選民登記的同時，多多宣傳公民權利同義務。

另一位選委界別議員李鎮強就建議，研究18歲以上人士「自動登記」，「唔做（選民）咪自己取消（登記）」，從而減低行政成本。佢仲建議政府同唔同部門一齊合作，用唔同形式包括實體、網上等，令年輕人方便登記，因為「無論登記選民好，投票都好，都係一剎那嘅決定，點樣觸動佢嗰一剎那、一秒鐘嘅決定呢，就好似談戀愛一樣，就可以令佢成為選民」。

聽到李議員以戀愛為喻，阿絲都覺得選民登記同投票率一樣「像極了愛情」，無得勉強嘅。唔知日後投票日會唔會定喺2月14日呢？完成選民登記，或者投完票又係咪會有花收呢？