週一 週二 週三 週四 週五 週六 週日
 12
3456789
10111213141516
17181920212223
24252627282930

政務SEE|想做香港人?先做瓦努阿圖人

個個想移民,唔通個個都想移民咩。話就唔係咁講喇,真係好多人想移民… 嚟香港架,話晒依家由治及興,嚟緊23條立咗法後仲會大大保障巿民同埋國家嘅安全,真係見到都流口水啊。今日《星島》有篇報道,話中國社交媒體同網站,出現大量用「第三身份」參與香港投資移民嘅帖文。

呢啲社交媒體好多都推介一啲小國,例如瓦努阿圖,阿絲上小紅書係噉意望吓,都搵到一大堆攻略,例如「香港投資移民最佳搭檔 小國綠卡瓦努阿圖 – 6W」、「從瓦努阿圖移民香港」等,通常都係教人先申請瓦努阿圖綠卡,然後再用投資移民方式申請移民香港。

阿絲真係大開眼界,原來申請瓦努阿圖綠卡單人只需約8000美元(約6.3萬港元)、四人家庭仲抵,只需11000美元(約8.6萬港元),資產證明35萬美元(約273港元),申請所需資料少,唔使出境去瓦國、唔使創業投資,更加唔會同中國籍身份有衝突。

呢啲中國網站同社交媒體好多都讚香港稅率低、自由巿場經濟、語言文化同中國互通,教育同醫療都有優勢。而且成為香港人之後,仲可以保留雙重國籍添,唔會影響喺中國嘅生意同生活,建議中國人如果想移民香港,可以先申請呢啲小國嘅身份。

帖文話大約6個星期就批核成功,有啲最快甚至係24小時,而最重要係,瓦努阿圖護照適用於香港「投資移民」,而且「一直是香港入境處多年來優先認可的第三國身份」。不過阿絲睇返入境事務處資料,香港投資移民嘅申請資格適用於大部份外國國民,只有阿富汗、古巴及朝鮮除外,又好似無講瓦努阿圖係「優先認可第三國身份」噃。

其實都真係唔怪得中國同胞咁興奮嘅,報道話舊版「資本投資者入境計劃」(即投資移民)共接獲約4.5萬宗申請,約3.5萬宗獲批,當中90%係已取得外國永久性居民身份嘅中國籍人士。如果你係已有歐美國籍嘅中國人,會唔會移民香港呢?可以想像,呢批有「外國永久性居民身份」嘅中國人,會係有咩國籍喇,盡在不言中。

泰國、越南、柬埔寨、老撾商人「富起來」想移民香港

除咗策略性移民瓦努阿圖,今日《星島》仲報道咗新版「資本投資者入境計劃」3月1號開始接受申請,有投資移民公司話有超過一半查詢者係「東南亞國家的高資產淨值人士」。

從事農業貿易嘅泰國商人梁先生已經決定參與計劃,仲話好多來自泰國、越南、柬埔寨同老撾嘅商人都對移民香港,非常有興趣。佢話近年有唔少產品由代理商經香港轉口去中國,但貨幣轉換始終不便,而且東南亞農戶已「富起來」,成日要周圍飛傾生意,希望通過計劃攞到香港身份,喺香港成立公司,出入中國做生意比較方便咁話。

有內地商人話自己睇好大灣區旅遊發展,打算喺香港大展拳腳,而且投資移民令中國人可以同時受惠中國同香港政策,身份唔使二選一,仲可以申請無條件限制逗留。嘩!呢招一石二鳥勁喎!佢仲話中國教育「內卷」嚴重,要入好大學唔容易,香港有國際化嘅教育水平,相信計劃會好受歡迎。

阿絲又想問喇,香港教育水平國際化到底仰賴甚麼?自由嘅學術氛圍?國際化嘅師資?國際化嘅收生?如果日後香港嘅大學教授同收生愈來愈單一嘅話,所謂嘅國際化仲存在嗎?為咗國際化呢個牌頭而嚟香港讀書,但同時間又令呢個香港用咗幾十年建立嘅形象變成名存實亡,係咪有啲本末倒置呢?不過當然喇,良禽擇木而棲,過橋抽板嘅嘢,你懂的。

熱門文章