《蘋果》結束三年記者投稿｜陌生的銅鑼灣

三年前，《蘋果日報》被迫停刊。三年後的今天，蘋果記者散落到哪裏？生活過得還好嗎？《光傳媒》昨起一連兩天刊出由他們親自寫下的感受。希望大家，一切安好。

【陌生的銅鑼灣】

六月代表呢一年過咗一半，每逢到呢個時間日子都好似過得好慢好慢。

轉眼過了三年，好多朋友離開，今年開始少聽到離開既消息，作為留下的我，呢幾年望到這個地方急速變化，不論係人、事、想法等等，睇到不少人已經忘記早幾年的香港，願意發聲的人很少，同時撐本地聲音都減少，有時這個地方好似有點陌生，正如今年六四當我在銅鑼灣工作，很多人問：「今日係咩日子？咁多警察？」、「係唔係有表演睇？」當中有內地遊客，同時有不少本地市民，一整晚很平靜，街頭最緊張就好似得傳媒同警察，這種陌生的感覺越來越重，只好努力記錄，努力認識。