週一 週二 週三 週四 週五 週六 週日
 12
3456789
10111213141516
17181920212223
24252627282930

政務SEE|尖沙咀年中試行打斜過馬路 東涌引入綠燈倒數秒數

香港人返學、返工慣咗爭分奪秒,運輸署透露引入綠燈倒數秒數,等行人知道仲有幾多秒剩,而家喺東涌達東路、美東街交界做緊試驗,唔知有冇讀者用過呢?而今年中尖沙咀加拿分道同加連威老道交界會試行打斜線過馬路,運輸署話要試行6至9個月,視乎成效再睇吓邊啲馬路適用喎。

立法會交通事務委員會今(17)日開會討論喺十字路口試行「對角行人過路處」,亦即係日本、台灣都好興嘅打斜過馬路,十字路口地面會有X形狀嘅斑馬線。

講起十字路口打斜過馬路,阿絲就記起3月有人因為喺十字路口打斜過馬路而被罰款2000蚊!好多網民都話好震驚,四邊都係綠燈嘅情況下打斜過馬路,原來係唔可以嘅,仲要即時被罰款!

講返試行計劃,運輸署今年1月底率先喺沙田圍站對出,沙角街、逸泰街嘅交界處試行,發現比原本過馬路慳返14秒時間,而新措施無增加到車輛平均等候時間,形容運作安全同暢順。署方諗住今年中喺尖沙咀加多個試點,就喺加拿分道同加連威老道交界,嗰邊係偏商業同遊客區。

今年中尖沙咀加拿分道同加連威老道交界會試行打斜線過馬路。 相片:Google實景圖

署方話會微調斑馬線整返闊啲,等市民打斜過馬路時鬆動啲,唔會同對面嘅行人撞埋。計劃會試行6至9個月,再決定邊啲馬路適用。運輸署署理助理署長區家傑話,呢兩次試驗都係細型、中型馬路,大型馬路啱唔啱打斜過馬路,仲要再研究。

不過,署方都講明大型馬路要打斜過,有好多考慮因素,例如行人打斜過馬路路程遠啲,一條45米長嘅對角,綠燈就要由41秒增至65秒,令更多車輛塞喺馬路。而當轉紅燈時亦需要時間消化車流量,變相行人等轉綠燈又要等耐啲。

除咗打斜過馬路,運輸署2023年10月起喺東涌達東路、美東街交界有新試驗,綠燈會顯示倒數秒數,等路人清楚知道仲有幾多秒剩,運輸及物流局副秘書長麥震宇話:「成效好嘅、保障到行人安全、車輛安全,我哋就會去第二啲地方推行」。

東涌達東路、美東街交界有新試驗,綠燈會顯示倒數秒數。 相片:Google實景圖

而家台灣都有打斜過馬路、綠燈顯示秒數嘅設計,阿絲覺得方便行人判斷要慢步、快步、急步定等下轉先過馬路。但講到尾,都係會有心急嘅人剩低幾秒都要夾硬衝過馬路。阿絲溫馨提醒大家,123紅綠燈,過馬路要小心,唔好為咗慳時間冒險呀!

熱門文章