政務SEE〡咩玩法？「來回團」過夜唔留港澳 黨媒讚「省成本締共贏」

「五一黃金周」聽日登場，港府估計會有80萬中國旅客訪港，又係時候「拼經濟」喇！《文匯報》今日（30日）報道，已有中國旅客提早到港，記者仲發現有旅客參加嘅「港澳三日團」係「來回團」，即兩晚分別留宿深圳同珠海，而唔喺港澳過夜。同報系嘅《香港仔》盛讚呢個安排「省成本締共贏」，仲話可以增加香港旅遊競爭力㖭。

聽日就係「五一」，旅遊業議會預料會有80萬名中國遊客訪港，其中包括800個旅行團，涉及2.6至2.8萬名團客。《文匯報》今日（30日）報道，為咗避開人潮，有旅客已經提早到港，佢哋嘅記者前日喺尖沙咀海傍仲同遊客做訪問。

來自雲南嘅劉先生參加咗深圳一間旅行社嘅「港澳三日遊」旅行團，雖然個旅行團標榜遊覽香港同澳門，但就唔會喺港澳留宿。劉生同記者講，團費只需千幾蚊港紙，「三日兩夜，在香港玩兩天，澳門玩一天，第一晚在深圳過夜，第二晚在珠海過夜」。換言之，劉生第一日由深圳到香港，當晚要折返深圳過夜；第二日重新到香港繼續行程，晚上再北上住宿珠海；第三日到澳門玩。劉生承認行程「有些奔波」，但價格是重要因素，「香港過夜的團，團費最少二三千元。」

報道話呢種旅遊方式叫「來回團」，又引述業界人士話，隨着陸路口岸同交通發展，「來回團」情況愈來愈常見。同報系嘅《香港仔》今日亦都有相關報道，內容仲大讚北上過夜能夠降低團費成本，增加香港旅遊嘅競爭力，達致「省成本締共贏」咁話。

呢個玩法，好似對香港酒店業界唔太有利噃！阿絲好奇上網搵「來回團」嘅資料，公道啲講，喺平常日子咁樣折返嘅「來回團」並唔常見。不過，利用港珠澳大橋一行多站、夜晚留宿珠海嘅旅行團就不在少數。

例如一個由廣東中旅（深圳）開辦嘅「港澳珠三天團」，第一日由深圳到香港，晚上經港珠澳大橋到珠海過夜；第二日由珠海到澳門，晚上返珠海；第三日在珠海觀光再返深圳。團費索價一千元人民幣，標榜遊覽港澳珠「純玩無購物無自費」。但有別於「來回團」，呢種團喺香港就只玩一日。

再睇下香港段一晝嘅行程，包括參觀黃大仙祠、西九文化區、山頂、維港天星小輪、尖沙咀鐘樓同星光大道，團費包50蚊酒樓「七餸一湯」午餐，行程算係相當經濟。當然，都有一站免稅店自由活動，同自費選擇參觀蠟像館同船遊維港嘅。

李家超：沉醉日常變化 誇大處理未必最啱

另外，聽日就係「月月煙火」嘅五一首場，旅遊業同餐飲業都話好期待。文體旅局局長楊潤雄之前做足期望管理，話有機會因天氣狀況而取消。特首李家超今日出席行政會議前，有記者問擔唔擔心天氣因素要取消煙花。特首就勸告「天氣係控制唔到嘅」，其他城市都會受天氣影響而更改活動。

然後佢話鋒一轉，「但係我覺得整體香港社會應該以積極同進取態度去睇所有問題……一齊將香港輝煌嘅、好嘅，講俾人聽，如果我哋經常沉醉喺一啲日常生活經常都會見到嘅變化，從而用一個誇大方式去處理，我覺得對整體香港……未必係一個最啱方法」。特首呢一句語重心長，真係令阿絲有唔少反思，可惜經過深切思考後，都唔係好理解得到，當中嘅奧秘可媲美「核心嘅外圍係核心內圍」。