政務SEE｜區區「夜殯紛」 大埔海濱公園驚現「冥婚」大紅花轎 中環海濱白色充氣裝置如置身「和合石」

為咗令香港人開心返啲，近期政府都真係好落力噃。噚晚網上瘋傳一張暗黑樹下花轎嘅相，令唔少網民驚呼「勁有冥婚感」，原來係大埔海濱公園嘅園圃布置，康文署話想為廣大巿民營造「幸福氛圍」咁話喎。令人驚嘆嘅除咗呢個「夜殯紛」花轎外，仲有中環海濱嘅「充氣世界奇觀」，嘩！又金字塔，又巨石陣咁，唔知真係以為去咗「吹氣版世界之窗」啊，不過朝早睇就全部白色，有網民話似去咗和合石喎。

阿絲睇返網民影嘅靚相，夜麻麻喺大埔海濱公園散步，見到呢個紅噹噹嘅樹下花轎，都咪話唔嚇一跳，有網民話好有「港產鬼片」味道，又話就嚟農曆七月，到時可以玩埋靈探。又係噃，不遠處仲有新娘潭，或者可以一併做條「靈探散步路線」，啱晒嗰啲鍾意「窮遊」嘅旅客喇，「猛鬼夜殯紛」打卡隨時影到啲意料之外嘅靚相𠻹。

有傳媒向康文署查詢，佢哋就回覆話呢個叫「囍迎花燭結良緣」嘅園圃係婚嫁概念設計，係之前3月維園嘅香港花卉展覽「十八區特色園圃」其中一個展覽作品。署方將呢個咁有特色嘅展品安置喺大埔海濱公園畀巿民繼續觀賞，希望呢個布置可以為巿民「營造幸福愉悅氛圍」，展期就會到7月初。

阿絲都真係好明白，署方的確用心良苦，鬼叫香港喺聯合國早前公布嘅《世界幸福報告》連續三年下跌咩，今年跌到86位，30歲以下年輕人嘅幸福度排名甚至跌到97位！比利比亞、伊朗、伊拉克、剛果民主共和國等發展中國家仲要低啊，陰公！

中式新娘花轎營造幸福感，喺中環海濱嘅西式「充氣奇蹟」唔知有冇令大家覺得人生充滿奇蹟呢？話說呢個「巨型充氣世界奇觀」裝置包括五個世界奇蹟：智利復活節島摩艾石像、埃及吉薩金字塔、英國巨石陣、意大利比薩斜塔，仲有法國凱旋門。朝早無着燈就全部白色，遠睇外觀啲確有啲奇怪，有網民話似「充氣墳場」，「以為自己去咗和合石」。

似唔似去咗和合石就見仁見智喇，不過近年香港經常出現極端天氣，阿絲比較擔心如果打風，呢啲巨型白色吹氣藝術品會唔會又漏氣啫。

呢啲「殯紛」嘢，其實都唔係第一次㗎喇。唔知大家仲記唔記得幾個月前，九龍灣東九文化中心外攞放白色LED花海，一大片白色花，當時畀網民話呢個「奠堂級」設計「大吉利是」。朝早就係白色花，話明LED花海，重頭戲就緊係夜晚喇，竟然係藍色燈，令人更覺得置身靈堂噃。引起網民熱議後，觀塘區議會就急急出嚟補鑊，將啲白花漆上粉紅色同橙色，算係勉強過關喇。不過花海裝置已喺上個月底完結，依家要拜山，啊唔係，要欣賞裝置藝術就要去中環喇。