週一 週二 週三 週四 週五 週六 週日
1234567
891011121314
15161718192021
22232425262728
2930  

政務SEE|葉劉激戰羅奇 再駁「香港玩完論」:19年IPO集資全球第一 網民:How about 2023?

一句「香港已玩完」激起千層浪,令立法會議員葉劉淑儀連日網上筆戰摩根士丹利亞洲前主席羅奇(Stephen Roach),話羅奇雖然嚿年嚟香港3次,但唔認識香港,甚至太驕傲唔肯認錯。葉劉仲列舉數據反駁,話香港19年IPO集資全球第一、2020年第二!不過就有網民留言「How about 2023?」Well,阿絲睇返數據,2023年香港IPO全球排名……第六。

葉劉「筆戰」羅奇,由登報撰文再擴大到喺社交平台X激辯。姐姐先禮後兵,承認2023年羅奇有嚟過香港3次,但認為羅奇仍然唔明香港股市升升跌跌嘅原因,又舉出香港嘅歷史數據,2019年香港上市公司數量同IPO集資額全球排名第一。

不過,有網民對呢筆「威水史」有疑問,仲講2019年?有網民話嗰時北京仲未喺香港實施《國安法》喎!亦有網民提醒葉劉,而家數據已經係2023年㗎喇!

羅奇再駁葉劉,話將過去26年香港股市低迷歸咎美聯儲決策係荒謬,香港嘅問題源於自身同北京造成(Hong Kong’s problems are of its own — and Beijing’s — making)。

葉劉捉住羅奇話香港股市低迷26年呢句,話羅奇唔認識香港,甚至太驕傲唔肯承認自己有錯(you don’t know Hong Kong, or are too arrogant to admit you are wrong)。今次葉劉update咗數據,指2020年香港IPO金額全球排第二,集資額513億美元(折合約4,000億港元)。

嗱,公平起見,阿絲搵埋最近3年香港IPO排名,21年、22年都係排全球第四位,2023年就跌到全球第六位,集資總額得返463億港元,留意返係港元,只得2020年集資額嘅1成多少少。

羅奇:19年後香港自治權明顯喪失

羅奇除咗喺社交平台X反駁葉劉,23號仲喺個人網誌寫咗篇文,佢承認《金融時報》篇文標題話香港已玩完係言過其實,因為無邊個國家、經濟體或城市會最終被視為「結束」或「完咗」,文章標題係警醒香港呢個自詡係「亞洲國際都會」嘅城市。

但佢仍然認為香港輝煌日子可能已經結束,更提出三大原因。首先喺19、20年反修例運動後,香港嘅自治權明顯喪失。其次,中國經濟喺可預見未來可能仍然處於困境。第三,香港嘅東亞貿易夥伴被迫喺中美之間揀一個,而美國嘅安全保護傘會令日本、南韓、台灣、菲律賓嘅選擇變得容易。

羅奇提到,好多朋友、公司已經離開香港,留低嘅公司已經開始討論應急計劃,佢強調:「人才出走的風險是非常真實的(The risk of a talent exodus is very real)」,大家對香港未來焦慮與日俱增,以前嗰種活力同無限樂觀已經消失咗。

李家超:香港堅持國際城市地位

面對「外國勢力」來勢洶洶質疑,港澳辦主任夏寶龍今日同港府高層見金融界、商界同商會。特首李家超話,香港會堅持國際城市地位,中央對香港嘅光榮前景充滿信心。財經事務及庫務局局長許正宇引述夏寶龍喺會上鼓勵業界多講好香港故事,講清楚香港金融發展嘅最新情況。

李家超話有一、兩個商會提及《基本法》23條,「佢哋整體嚟講都係話支持23條立法,因為喺佢哋嘅國家都係有呢個法律嘅」。記者會仲有兩位外國代表即場說好香港故事,馬來西亞商會主席顏溪俊話,喺宣布23條立法諮詢後,當地商界非常有信心留港。

而香港澳門奧地利商會主席Wilhelm Brauner話,23條立法目前仍喺諮詢階段,會觀察最終結果,又話香港有法治傳統,有信心會妥善執行23條相關法律。

相關文章

熱門文章