政務SEE｜葉劉駁「香港玩完論」 批羅奇幾年無訪港 羅奇：23年訪港3次

摩根士丹利亞洲前主席羅奇（Stephen Roach）早前喺《金融時報》撰文，直指「香港已玩完」（Hong Kong is over），言論震撼各界。新民黨立法會議員葉劉淑儀噚日投稿《金融時報》，反駁港股持續下滑嘅根本原因係美國政策，又話羅奇幾年無嚟香港喇，歡迎佢返嚟見證香港點樣持續繁榮發展。點知羅奇「駁上駁」，話葉劉反駁乏力，仲搞錯事實，自己嚿年3次到訪香港。

羅奇作為中國概念「大好友」，一句「香港已玩完」觸動港府高層神經，連日嚟港交所主席史美倫、財經事務及庫務局局長許正宇、政務司司長陳國基都排住隊反駁。最新成為「反駁隊」一員仲有行政會議召集人、新民黨立法會議員葉劉淑儀。

《金融時報》噚日就刊登葉劉署名嘅反駁文章，佢話香港股市持續下滑嘅根本原因係美國政策，加息將資金吸返去美國，而聯邦退休基金唔再投資香港嘅政治決定，削弱咗西方資本流入香港。

葉劉再為《國安法》辯護，指大家嘅擔憂被誇大咗，形容香港早就繼承咗英國嘅國安法，只係更新同現代化現有嘅法規，並增加新條文應對近年「日益擴大和多樣化的國家威脅」。作為前保安局局長推動過《基本法》第23條立法，葉劉話香港司法獨立仍然穩固，新嘅本地國家安全立法，將保障普通法給予嘅權利同自由。

除咗反駁，葉劉仲負責「唱好」中國，話香港同廣東省嘅整合同激烈競爭，將促進變革，中國繼續係人才、資本、政策支持同新思想嘅主要來源。文章尾聲，葉劉仲話羅奇已經有幾年無返到香港，歡迎佢再次訪港，親自見證呢座城市點樣持續繁榮。

葉劉投稿出街後，羅奇噚日喺社交媒體X發文，形容葉劉提出一個非常無力嘅反駁（making a very weak counter case），將香港嘅困境歸咎俾美國聯儲局。葉劉又錯誤斷言佢無嚟香港幾年，事實上羅奇2023年就嚟咗香港3次。

唔知呢場「駁上駁」戲碼仲會唔會延續落去呢？不過，阿絲就有啲擔心，羅奇咁樣算唔算「唱衰」香港？下次入境香港時，記得拎葉劉篇文出嚟，強調係姐姐歡迎我入境㗎！