政務SEE｜城大慶祝升格大學30周年 北上深圳設校友晚宴

近年港人北上飲飲食食，大學都加入潮流。香港城市大學最近發電郵，邀請校友參加5月底喺深圳酒店嘅晚宴，慶祝學校升格為大學30周年。有城大校友話，無諗到一間香港嘅大學會喺深圳設宴慶祝。睇返城大封邀請信，晚宴每位收港幣550蚊，預120人參加，唔知校友覺得抵唔抵呢？阿絲上城大官網睇，晚宴活動已經額滿喇。

有城大校友同阿絲分享，早幾日收到城大校友聯絡處嘅電郵，話城大5月31號喺深圳東海朗廷酒店搞晚宴，慶祝學校升格為大學30周年，城大校長梅彥昌教授都會出席晚宴，分享大學最新動向，仲指晚宴有機會認識來自唔同城市嘅校友會領袖。

晚宴協辦機構都透露咗有咩校友到場嘅線索，包括上海、北京、成都深圳校友聯誼會等等，而晚宴嘅語言都係用普通話。

有城大校友就慨嘆：「一間喺香港成立嘅大學，慶祝自己升格成大學30周年，竟然唔係喺香港設宴慶祝。唔通而家係慶祝『深圳城市大學』正名做大學30周年？」佢暫時亦收唔到消息，香港會搞返一場校友晚宴，「諷刺啲咁講，原來城大係咁唔支持香港嘅飲食業晚市嘅！」

阿絲搵返資料，其實城大好多年前都曾經喺深圳搞校友晚宴，例如2010年已經喺深圳華僑城舉辦校友晚宴，表明歡迎所有城大校友，尤其係深圳及鄰近地區嘅校友出席。2012年又喺深圳搞晚宴，話要加強同「內地校友」嘅聯繫。

近年香港嘅大學都錄取唔少中國學生，例如睇返2022/23年度喺教資會資助課程，城大一共錄取咗1,895位中國學生，當中1,144位讀學士學位、751位讀研究院研究課程。中國校友畢業後，可能留港工作，亦可能返去中國北京、上海、廣州、深圳搵食。

城大最近亦公布，中國教育部喺4月16日向廣東省人民政府發函，批准正式設立城大東莞分校，預計今年9月開學，到時設4個本科、10個碩士課程。

今次城大喺深圳慶祝大學升格30周年，方便咗一班中國校友。有城大校友認為，變相係對香港校友嘅審查，「只要你冇回鄉證，或者擔心入境中國大陸，個晚宴就唔歡迎你參加。校方係咪想間接篩走呢班校友呢？」

其實香港都搞返一場晚宴就皆大歡喜囉，仲可以增加吓本地酒店、酒樓嘅生意㖭！阿絲上禮拜五問過城大傳訊及數據研究處，點解喺深圳搞校友晚宴？會唔會喺香港都搞返場晚宴慶祝升格大學30周年？暫時就未收到回覆喇。