政務SEE｜阿里王子官網重新上線 大曬外國名人合照 昔日香港活動照全消失

6月就嚟完，杜拜嘅阿里王子（Sheikh Ali Rashed Ali Saeed Al Maktoum）仲未重臨香江，主持家族辦公室開幕。阿絲發現王子最近重整旗鼓，官網連日上載王子同唔同人嘅合照，例如美國饒舌歌手Snoop Dogg個仔Cordell Broadus、林寶堅尼家族成員Tonino Lamborghini等，似乎想向外界表示，王子仲係好多人想見㗎。

阿里王子家族辦公室開幕一拖再拖，起初話5月來港，後來家族辦公室行政總裁麥懿睿就話，王子6月前嚟香港。點知王子喺杜拜嘅禮賓和安全事務主管Marco Carenzi發聲明，話麥懿睿同阿里王子嘅公司已冇任何瓜葛喇。

阿絲發現，王子嘅家族辦公室官網已經刪咗舊有管理團隊嘅頁面。而曾經擔任國際戰略關係總監嘅William Tien嘅linkedIn顯示，佢上月已經離職喇，頭尾加埋淨喺返咗7個月工。睇嚟王子已經重整班底，放棄咗麥懿睿同William Tien噃。

但作為香港人，最擔心嘅係6月都就嚟完喇，王子嘅香港家族辦公室仲係冇聲氣，究竟王子忙緊咩急事呢？阿絲睇返家族辦公室官網，4日前開始頻頻更新王子動向，第一個post就係分享同美國饒舌歌手Snoop Dogg個仔Cordell Broadus合照，王子形容對方係年輕而有野心企業家，會盡可能喺網絡、遊戲和營銷領域建立長期合作。

王子又見咗法國網紅El-Hachemi Sabi，仲形容對方係Top 1 French Influencer㖭，睇返社交媒體數據，呢位網紅喺ig都有140萬人追蹤、TikTok有43萬人關注、YouTube有11萬人訂閱。算唔算Top 1呢？留俾大家評價喇。

咁多位貴賓當中，林寶堅尼家族成員Tonino Lamborghini算係富豪一員，有酒店、房地產等項目。王子官網提到兩人討論未來合作機會，喺某啲項目上有共同願景。而官網顯示，目前唯一有具體啲合作嘅項目，就係王子同杜拜嘅法務集團Al Sabtan Legal Group簽署一份合作協議。咁出嚟行走江湖，都真係要有專業法律團隊嘅。

至於王子昔日出席香港唔同場合嘅相片，包括出席「裕澤香江」高峰論壇、同恒生大學簽署合作備忘錄等等，暫時喺官網已消失得一乾二淨喇，唔通王子覺得喺香港嘅經歷麻麻哋，要忘記受過嘅傷害？