政務SEE|《文匯報》趕絕「軟對抗」系列頭版「招呼」民間書展 店外電梯文宣照入書店數

近日幾間被書展拒諸門外嘅獨立書店搞咗個民間書店祭,上周六打風前有過百讀者排隊,反應非常唔錯。不過同時間就惹嚟官媒狙擊喇,今日《文匯報》以全面頭版報道「『獨立書展』展『獨書』」,煽動反中亂港「軟對抗」。記者仲「放蛇」部分獨立書店,話書店有「反中亂港組織『記協』」籌款箱,又貼滿「黑暴文宣」喎。

《文匯報》呢個「趕絕『軟對抗』系列」已經唔係第一次點名批評,噚日(20日)就報道社區服務團隊「維修香港」打着「義務維修」旗號,「挑撥社會大眾對政府不滿情緒」,又話佢哋「掛羊頭賣狗肉,不時發放疑似帶有煽動意圖的帖文,詆毀特區政府的施政」。舉例政府近年引入非本地培訓醫生,指「維修香港」發文稱有街坊喺公立醫院覆診遇到唔識英文嘅醫生,「大家對醫療系統逐漸失去信心是回不到過去」。報道話社交平台上時常出現針對社會議題嘅群組,成為「軟對抗」大本營。

今個月初,《文匯報》又曾以全版文章報道本土研究社「軟對抗」,以「失實言論」中傷政府,仲「放蛇」參加分享會,指活動「甚有『反政府』意味」,話佢哋「搞活動挑戰國安底線」。該報又深入調查本研社,列出「惡行」列表,指組織過去兩年多次批評政府的發展計劃,包括反對新田科技城、反對洗衣街/花墟道重建項目、要求取消「明日大嶼」等。

又煽動,又挑撥巿民對政府不滿情緒,又中傷政府,真係聽到都覺得痛啊!義務維修、搞保育工作同研究被定性為「軟對抗」,賣書搞文化活動又點能夠「逃過」《文匯報》嘅「法眼」呢!

該報記者「放蛇」獨立書展祭,話發現有好多書都「釋放大量反中亂港訊息」,記者特登問店員有無賣《黎智英傳》,店員話書展結束後先會拎出嚟賣,記者就以此證明「書店所售書籍內容含有『軟對抗』性質是心知肚明」。

記者仲列出幾本「反中亂港」書籍,包括前立法會議員劉慧卿所著嘅《留下》、前公民黨創黨成員韋安仕在2000年出版的《香港新貴現形記》,仲「開心大發現」《香港新貴現形記》書封出現唱衰香港主權移交嘅言論,一再「煽動巿民反政府情緒」。

除咗售賣「軟對抗」書籍,報道又話一拳書館為「反中亂港組織『香港記協』籌款」,而序言書室嘅店外電梯就貼有「黑暴文宣」,包括印有「歡迎人與狗,警察不得進入」等「反中亂港字樣」。連店外電梯貼紙都入書店數?原來搭個𨋢都隨時煽動到人「反中亂港」,阿絲真係好擔心特區政府啊。

指報道法庭新聞網媒「刻意用偏頗話語誤導事實」

其實呢啲對於阿絲嚟講都唔意外,但最令人瞠目結舌嘅,係指報道法庭新聞嘅網媒「對抗《國安法》」!記者話喺一拳書館門外同店內,發現有海報或刊物,掃QR Code就可以連到《庭刊》同《法庭線》網站,記者去網站查看,再次開心大發現兩個網站關注嘅案件極為相似,主要係暴動、煽動罪、《國安法》等相關案件,指其有「刻意用偏頗話語誤導事實」嘅嫌疑。

而兩個網媒「誤導事實」嘅根據,就係有關47人案嘅報道,《文匯報》指報道「多以被告者或上訴方的辯詞為主,以極大篇幅講述他們上訴的理由,以及表達對他們量刑的偏頗觀點,容易令讀者偏信辯方」。唔知《文滙報》記者係咪唔夠時間做呢隻故仔,睇漏咗兩間媒體有關控方嘅報道呢?阿絲建議佢功課要做返足啲噃,唔係就好似官員譴責某啲媒體「以偏概全」咁㗎喇。

至於「軟對抗」可以點應對?記者訪問咗多名立法會議員,有人話巿民若發現可疑書籍或元素,應立即向警方舉報,又認為「獨立書展」同有關書店「掛羊頭賣狗肉」,「公然販賣釋放反中亂港元素的書籍,不排除違反國安法,促請有關部門盡快跟進」。

針對有參展書店和出版社表示書展不應有審查,有議員就話呢個係「謬論」,「絕不容許出現煽動危害國家安全的刊物,因此現行書展審查機制具必要性」。而另一名議員就強調香港享有嘅出版自由建基喺合法之上,「任何書籍只要合法,包括符合香港國安法等均可出版」。聽到呢句,香港人立即清楚晒,一目了然、毫無懸念啊!

相關文章

熱門文章