政務SEE｜東江水供港60年 各界慶賀 水務署數據2023年大腸桿菌超標17倍

今年係東江水供港60年，港府敲鑼打鼓熱烈慶祝，又搞藝術展、專題講座、中國考察團咁，特首李家超仲喺紀念典禮表達感恩之情，話東江水係香港「生命之源」、「血濃於水的深情典範」。2023年底港府簽訂新一份買東江水協議，由舊年開始至明年每年加價2.39%，三年共花157.7億元買水。不過阿絲記得幾年前有傳媒去東江水源頭抽樣本化驗，發現含菌量嚴重超標，好奇之下翻查近年水務署嘅報告，竟然發現有樣本嘅「糞大腸菌群」超標17倍！

水務署會定期檢測木湖原水抽水站接收嘅東江水水質，根據2022年10月至2023年9月數據，「糞大腸菌群」最高數值達每公升34,000個，若以標準值少於2,000個計，嚴重超標17倍！但由於全年數據平均值係440個，低於標準值，所以水務署認為仍屬達標。2023年10月至2024年9月最高值就係3,300，雖然有所回落，但仍高於標準值。

而呢個「糞大腸菌群」就係我哋一般認知嘅「大腸桿菌」，係生長喺人同動物腸道中嘅細菌，隨糞便排出體外。不過，東江水淪為「屎水」其實都唔係咩新鮮事，睇返以前嘅報道，《東方日報》喺2013曾去中國抽取東江水樣本，發現重金屬鐵含量超出中國標準6成，渾濁度亦超出世衞飲用水標準。

報道又指，由2010年起東江水曾發生多次受污染事件，例如2010年深圳水庫上游附近嘅垃圾站、食品場及煉金工廠每日將廢水傾倒入支流，2011年發現東江水源頭尋烏縣一間非法煉銅廠多年來嚴重污染源頭。2016年廣東嘅東江支流被揭發有60幾袋、逾千隻死雞被棄草叢。2017年又發現東江水上游支流嘅河源柏埔河，有污水滲地底、老鼠橫行，新豐水庫旁還有大量牛隻染病死亡。而當年嘅中國官員就話涉及大型事故，先會通報香港，原來呢啲竟然只係小型事故？當時唔少議員都質疑粵港之間嘅通報機制有無漏洞。

2018年東江水樣本大腸桿菌超標29倍

東江水受污染問題一直都無解決，2018年水務諮詢委員會（水諮會）考察東江水，抽查水樣本發現大腸桿菌含量曾達每公升6萬個，超標29倍。時任主席陳漢輝怒斥「不能接受」，而水諮會亦屢次向中國反應，中國當局當時稱會確保河流兩岸污水不會流入深圳水庫。而跟據水務署資料，同年喺香港木湖原水抽水站接收嘅東江水，大腸桿菌含量同樣達每公升6萬個。

源頭嘅污染依家到底解決咗未？死雞、死牛有冇繼續發生，好似無咩人跟進，不過2023年底發展局同廣東省政府簽訂新一份買東江水協議，2024年至2026年每年加價2.39%，共花157.7億元買水。

《光傳媒》曾比較各地水價，2024年香港每立方米約6.26港元，比澳門買西江水每立方米3.06港元貴一倍。而根據粵海投資嘅年報和水務署數據計算，2022年深圳、東莞獲供水約14.39億立方米，買水只係需要15.09億港元，以此推算每立方米水價僅約1.05元，只係香港嘅6分之1。點解澳門買西江水比香港買東江水平1倍有多呢？當時廣東省當局解釋，廣東省為水付出嘅代價，實際上遠大於香港付出嘅買水價，因為要斥巨資保護水資源咁話喎。

今日工聯會：見證「香港所需祖國必應」 2017年曾鈺成：供水唔係無償援助

阿絲慣咗話當年，都係講返新嘢先。東江供水60年，無論屎水又好垃圾水又好，作為香港蟻民阿絲當然感激流涕，無東江水就無今日嘅香港，所以社會各界都舉辦咗唔少活動慶祝，例如工聯會就舉辦「東江情繫香江六十載」系列活動，播放紀錄片《東江之水越山來》、辦交流團等，主席吳秋北話東江輸水情誼，遠超經濟數字，因為佢承載住祖國對香港「優先供水」嘅承諾，「蘊含河源民眾遷村讓地、植樹護源的犧牲」。紀錄片仲歌頌咗建設者嘅無私，見證「香港所需祖國必應」嘅深情。

阿絲雖然未睇條片，都已熱淚盈眶，不過眼淚未滴出來之前，又突然諗起前立法會主席曾鈺成噃，佢喺2017年曾撰文指，對港供水項目為廣東省擁有的嘅粵海投資創造豐厚利潤，如果將東江供水講成係國家對香港嘅特殊照顧，好多港人會「聽唔入耳」，因為供水並唔係無償援助。

咁到底係情誼，定係買賣？隨着時日變遷，或者都有唔同嘅定義，至於點樣定義，就交返畀啲有權勢之人喇，蟻民都係柒返去飲_水算喇，阿婆話齋病從口入禍從口出啊，有啲嘢有入無出，就係最安全嘅。