政務SEE｜民政搶人材搶到去澳洲 邀前港語學主席陳樂行任公職

前「港語學」主席陳樂行今日喺社交媒體話，噚日收到民政及青年事務局嘅信件，邀請佢交履歷畀香港政府參考，佢喺文中透露，今次已經唔係第一次受港府邀請擔任公職。對於邀請，陳樂行表明拒絕，「唔使客氣喇，仲衰過話泰國有份筍工俾我打。幫政府搞社區活動，又要墊支又要冒國安風險，鬼同佢做咩」。

依家住喺澳洲嘅陳樂行，前年被香港國安話佢搞嘅廣東話徵文比賽違反《國安法》，仲上門搜查，但佢當時已經旅居澳洲。而呢次亦唔係第一次有政府部門邀請佢擔任公職，佢喺文章話2021年因為港語學推動廣東話文化嘅貢獻，曾獲邀成為「中文界面諮詢委員會」嘅「青年委員」，仲去政府總部面試𠻹，不過最終未有成事。

陳樂行當然拒絕今次邀請喇，仲提醒大家，民政事務總署拒絕償還港語學42萬嘅廣東話活動經費，當時署方仲主動報國安啊！「我好難估計，唔知呢個政府想點，4年前邀請我加入委員會，2年前就報國安拉我，而家又叫我寄履歷，到底想點？」

如果政府真係有意請佢返香港擔任公職，佢又會唔會返去呢？佢就話「唔使客氣」，「仲衰過話泰國有份筍工俾我打。幫政府搞社區活動，又要墊支又要冒國安風險，鬼同佢做咩」。

翻查資料，港語學喺2023年8月宣布停運，當時國安要求港語學下架徵文計劃中一篇涉違反《國安法》嘅文章，不過民政署就同傳媒講，向警方舉報嘅唔只係徵文計劃，還有兩項活動，涉及約17萬獲批款額。陳樂行對指控表示非常驚訝，而且從來無人話畀佢知邊個活動犯咗法。

陳樂行當時向傳媒透露同國安嘅對話錄音及截圖，對方不斷追問自己身在何方、係移民定旅遊，仲點名港語學嘅前成員，又話搵過佢老豆。陳覺得呢件事證明若回港有風險，原本打算回港，但已無法繼續喺香港工作，流亡喺意料之外嘅事。佢又指過去幾年一直按規定，向民政事務總署提交報告同回覆署方來信，但署方一直拖，導致大批活動無法完成，甚至要自己墊支至少30幾萬，款項一直被拖欠，更被署方追收已獲發嘅款項。