政務SEE｜嚟香港露營慳住宿費 深圳買裝備 旅客：香港物價高

五一黃金周一連5日假期，據入境處數據，尋日約22.1萬中國旅客訪港。本港飲食、零售業對黃金周抱好大期望，不過多間港媒報道，相比購物，好多中國旅客似乎對香港嘅郊野有更大興趣噃！好多都會帶埋行山同露營裝備過嚟，仲一早喺深圳買好裝先嚟香港，話香港啲嘢太貴喎。亦有家長同小朋友參加親子遊去行麥徑，每人158蚊「快閃」即日來回，慳返住宿費。

中國旅客黃金周嚟香港玩，飲食同零售業界都抱好大期望，希望旅客消費有增長。不過呢兩日就有好多媒體報道，唔少中國旅客因為想慳返住宿費，所以選擇去郊區露營。有廣洲嚟嘅遊客就話，一行8人去西貢露營3日，但裝備呢，就一早喺深圳買定，因為香港啲嘢貴。

另一個遊客話過嚟玩3日，會喺鹹田灣露營，但香港物價高，所以早喺中國買定物資，花咗約3千蚊人民幣。又有人話香港住宿費貴，過嚟玩4日其中有2日露營。

就算唔露營，都有大把平價快閃團，可以減少喺香港消費，有家長就帶小朋友參加即日來回親子遊，行麥理浩徑，位位158蚊玩足全日。

據入境處數據，尋日有約28萬旅客入境，中國旅客佔22.1萬；另約29.6萬港人出境，當中24.4萬人經陸路口岸北上，比入境旅客多。香港人鍾意北上消費，但中國旅客就搞盡腦汁嚟香港「零消費」，阿SEE都真係替飲食同零售業擔心啊。