政務SEE〡團體連日到領館抗議 橫額如倒模 標點都一樣

有人話「後國安法」時代，香港集會示威絕跡，阿絲就唔係幾同意嘞。每日視黨報為精神食糧嘅阿絲，今日（22日）就睇到「各界連日赴領館抗議」嘅報道，最少有5個團體去外國駐港領事館示威，「 向外部勢力干預說不」。見到咁「五光十色」嘅言論自由，當然令人欣慰啦……咦？！不過5張示威相顯示嘅橫額，點解除咗國家名，用字同標點符號都完全一樣嘅？

民主派初選案日前裁決，《文匯報》今日話，「正當市民歡慶正義得以伸張時，美西方反華亂港勢力大肆污衊是次判決……激起香港社會各界的極大憤慨」。於是，多個團體就去外國駐港領事館示威嘞。報道仲話，根據「不完全統計」，周三同周四（20日、21日），「先後有二十多個團體逾300餘人次參加了抗議活動」。

報道圖文並茂，除咗講團體同市民去邊度示威，仲有5張團體示威相𠻹。但當阿絲睇多幾張相，就發現每張相入面，橫額內容都咁似嘅？再睇真啲，5張不同團體去不同領事館嘅相，橫額用字幾乎完全一樣，全部都係「強烈譴責」某國，「藉“35+顛覆政權案” 抹黑香港法治，干涉中國內政」。

引號用“ ” 而非「」

值得留意嘅係，除咗用字「心有靈犀」之外，更神奇係引號都一樣用「“ ”」，而唔係香港常用嘅「」。阿絲查過資料，「“ ”」引號係中國《標點符號用法》規定嘅引號格式嚟嘅。

阿絲又發現，除咗報道講嘅團體外，民記（民建聯）同工記（工聯會）都有去外國領事館示威。民記橫額內容係「強烈譴責美國 抹黑香港法治 干涉中國內政」；工記就係「強烈譴責英、美方藉『35+顛覆政權案』抹黑香港法治 干涉中國內政」。兩黨橫額用字，都同黨媒報道嘅團體大同小異，不過工記用嘅引號就變返香港常用嘅「」，咁先「一國兩制」嘛。

翻查資料，建制團體「心靈相通」都唔係第一次。今年2月，多個團體去美國駐港領事館，抗議美國國務院亞太事務助理國務卿康達，同4名被港通緝嘅袁弓夷、郭鳳儀、許穎婷、邵嵐會面。佢哋帶嘅橫額，都寫住「強烈譴責美國官員 勾連外逃反中亂港分子」。而香港第一大黨、民記當時拉起嘅橫額，用字亦都一模一樣喎。

阿絲就覺得，既然我哋有「五光十色」嘅言論自由，就應該好好利用喇，民間團體同政黨都用同一組字，好易畀西方勢力誤會我哋嘅言論自由「黯淡無光」啊。