政務SEE〡性教材衝出國際 傳李家超有微言 有官員斥炒作別有用心

自從教育局公布中三性教育教材後，社會連日嚟熱烈討論「打羽毛球」係咪可以遏止性衝動。呢個問題仲帶領香港「衝出國際」𠻹，歐美亞洲多地傳媒相繼報道。今日就有報章引述消息人士話，特首李家超喺早會「有微言」，質疑教育局有冇引入「紅隊」機制檢視教材。阿絲就覺得，教材「出事」反映設計、審批制度有問題，唔從根本出發，怪有冇紅隊「守尾門」，好似有啲捨本逐末喎。

教育局日前公布「公民、經濟與社會科」（公經社科）有關中三性教育嘅教材，其中提議遏止性衝動方法包括「去球場打羽毛球」；用「承諾書」訂立「親密界限的承諾」，引起社會熱烈討論。好多立法會議員直斥「不合時宜」，有議員仲反問「係咪要回到驗處女、處男思維」；教育局就反駁話重點在於保護青少年。阿絲同網民就關心，情到濃時要訂羽毛球場，到底book唔book得切。

唔止香港熱烈討論，事件仲引起外媒關注，英國、美國、新加坡、台灣都有傳媒報道事件。其中，英國三大報都有報道；美國《紐約時報》仲話，多得香港教育局，創造咗關於性嘅新俚語，「我想同你打羽毛球」從此有咗新含義。

連「境外勢力」都關注，港府當然唔可以置之不理啦。《明報》政治專欄「李先知」今日（29日）引述消息人士話，特首李家超喺政府早會上有微言，李引用傳媒評論，質疑教育局喺制訂教材嗰陣，有冇經過「紅隊」挑戰。文章引述有官員話，特首唔係質疑性教育方向，而係部分教材內容易招人話柄咁話。

有官員稱「軟對抗」易被「小事化大」

文章仲引述會上有人指出，教材針對初中學生，重點應該係未成年人士發生性行為，本身已經違法。另外，有人就覺得事件「小事一樁」，但連日成為網上以至外國傳媒熱話，係「別有用心嘅炒作」。呢位人士仲覺得，即使有「紅隊」，都未必可以消除爭論，因為「一日『軟對抗』存在，即使政府幾小心，都可以被『小事化大』」。

阿絲讀得書少，不過就學過一個詞語叫「見微知著」。小至一份教材、大至政府政策，如果制訂過程本身充分諮詢專業、廣納意見，本身制度就有紅隊功能啦。相反，由同一班人用同一視角去做「紅隊」，效果係點，大家都預見得到。

教學活動未經委員會審議

兩日前（27日），《信報》政治專欄「余錦賢」引述「課程發展議會」轄下「個人、社會及人文教育委員會」個別成員亦對教材有微言，呢個委員會係有份編寫公經社科課程指引。不過，有成員話，委員會雖然曾經討論、通過課程指引，但教材裏面部分教學活動建議，係未經委員會審議，認為局方寫教材係「閉門造車」。

《明報》文章最後提到，有官員認為事件可能已經對青少年嘅價值觀造成不良影響。阿絲真心希望政府重新審視教材制訂嘅流程，畢竟性教育可能影響青少年嘅一生。冇咩事，阿絲去訂場打波先啦。