政務SEE〡立會食安江蘇考察團 僅6議員參加 隨行官員多一倍 陳家珮 何君堯報名後「甩底」

暑假又到啦，立法會轄下嘅事務委員會通常都會趁休會期間，搞考察團出外考察。好似「食物安全及環境衛生事務委員會」就準備聽日（21）去江蘇嘅南京同揚州訪問4日，考察當地嘅食安設施。不過，《信報》今日報道，食安委員會15個委員，只有3個報名參加，同一時間，就有3個非委員嘅議員，同12名港府官員隨團，有前議員就認為，情況「實屬罕見」啊！

「食物安全及環境衛生事務委員會」聽日將會去江蘇南京同揚州訪問4日，呢個以食安委員會名義搞嘅考察團，團員組成相當「特別」，只有3名食安委員會委員、3名非委員，同受邀出席、包括環境及生態局局長謝展寰在內嘅12名政府官員。

《信報》報道話，呢個考察團喺討論初期，議員反應冇咁「慘淡」嘅，一開始有成10個議員話有興趣。點之搞搞下，應承去嘅愈嚟愈少。到出文件嗰陣，剩返7個，包括委員會主席兼今次考察團團長楊永杰、委員梁文廣、江玉歡同陳家珮；以及非委員嘅謝偉俊、何君堯同謝偉銓。

點知臨門一腳，陳家珮同何君堯竟然「甩底」，加埋後期入團嘅非委員張欣宇，最終立法會議員只有6個，委員同非委員各3個；反而應邀出席嘅政府代表仲多一倍。

報道引述有議員話，原本預計行程重點係考察當地食物安全檢測機制，同高科技環境衛生設施，但最終一半行程都係考察漁農業企業，所以就冇參加嘞。不過，身兼委員嘅漁農界議員何俊賢都冇參加噃。阿絲睇佢Facebook，原來何議員上周末去咗陽江參加當地嘅「開漁活動」，唔通個考察團吸引力，比唔上陽江嘅開漁節？

報道又引述有前立法會議員話，經過密集會期，議員放假外遊「叉電」都好正常。不過，佢承認委員會搞嘅考察團，結果15個委員得3個報名，就「實屬罕見」嘞！

4日3夜南京揚州團 預算開支每人近萬元

睇返上月內務委員會文件，呢個4日3夜考察團聽日（21）由香港出發到南京，之後仲會到揚州。來回經濟客位機票，加3晚酒店連食宿，每人預算開支要9,730蚊。團費係唔係議員自己揞荷包？貴為議員，俾錢呢啲粗重工夫梗係唔使自己啦，都係等納稅人嚟啦！

睇返立法會現行安排，每名議員喺4年任期內，有一筆5.5萬蚊嘅「職務訪問帳目」，俾佢哋參加立法會轄下委員會舉辦、去香港以外嘅職務考察，如果用晒可能就要自己畀啦。平均計算，每名議員每年即係大約有萬四蚊左右。

議會聯絡小組外訪預算50萬元

不過，唔好以為議員嘅外訪費用津貼只有呢筆。立法會轄下、專門同各地議會機構建立聯繫嘅「議會聯絡小組委員會」，係有專門嘅外訪預算，今個財政年度，小組就有50萬元核准外訪預算嘞。

好似今年3月，立法會主席梁君彥同小組委員會7名委員到印尼、新加坡和馬來西亞訪問7日，每人預算要4.1萬元，全部團費就由呢筆預算畀。阿絲突然諗起阿劍后嘅名句，喺香港做議員真係好幸福啊~~