政務SEE〡江玉歡：文化委員會成員好多來自商界噃 麥美娟：用人唯才

立法會議員江玉歡今日（3日）提出口頭質詢，話政府嚿年成立嘅「文化委員會」，成員大部分係金融界、商界出身，只有少數係文化機構領袖，問政府委任諮詢組織成員嘅標準。謝偉俊亦問到，政府點樣防止喺委任成員嘅時候出現「馬房主義」、「分餅仔」。聽完有「立法會壞孩子」之稱嘅謝議員提問，阿絲反而想問，乜而家唔係咁咩？

選委界立法會議員江玉歡今日（3日）提出口頭質詢，問政府點樣確保現時520個「諮詢及法定組織」，角色同職能配合到社會需要。佢仲點名話嚿年成立嘅「文化委員會」，成員大多數係銀行、金融同商界出身，只有少數文化機構領袖，問政府用乜嘢準則去委任成員。

另一名選委界議員謝偉俊就話，坊間有意見話政府委任成員嗰陣，有「馬房主義」同「分餅仔」，問政府點樣防止現象唔會發生。

民政及青年事務局局長麥美娟就答，政府委任諮詢及法定組織成員，基本原則係「用人唯才」，考慮有關人士嘅才幹、專長、經驗、誠信等。另外，政府一直沿用「六年任期」（非官方成員不應擔任同一組織的同一職位連續或累積6年）同「六會限制」（不同時在6個組織任職）的規定。

麥美娟又話，「文化委員會」而家有23個非官方成員，基本上都具備同文化藝術或創意產業相關嘅背景，部分成員同時有其他專業範疇，如政商界、銀行界嘅的經驗，認為「可以提升同擴闊文化委員會嘅討論」。

成員包括唐英年 曾志偉

睇返文化委員會成員名單，主席係文體旅局局長楊潤雄，副主席係AO（政務主任）出身、做過藝發局主席，又喺商界打滾多年嘅王英偉。其餘23名成員有鄭志剛、鄭維新、鄭泳舜、周永成、霍啟剛、黑國強、紀文鳳、林顥伊、梁高美懿、羅仲榮、呂汝漢、毛俊輝、黃永光、唐英年、曾志偉、鄭新文、胡陳德姿、楊余夏卿、楊勇、楊政龍、楊偉誠，同埋盛智文。

睇完個名單，阿絲都同意政府所講，大部分人「基本上具備與文化藝術或創意產業相關的背景」，例如藝發局、演藝學院校董會、藝術中心監督團成員等等。不過，江議員都講得冇錯噃，大部分成員的確係商界出身，部分仲係商二代，喺商界、金融界名氣遠遠超過喺文化界地位。例如商界出身嘅唐英年，市民會記得佢係「政壇金句王」、減紅酒稅，都未必醒起佢係現任西九文化區管理局董事局主席，仲幫緊西九「撲水」。

阿絲就覺得，不如引用特首講嘅「以結果為目標」，就等市民睇下一眾文化委員會成員，幫香港喺文化藝術、創意產業諗到咩策略，睇吓係咪局長所講嘅「用人唯才」喇。