週一 週二 週三 週四 週五 週六 週日
1234567
891011121314
15161718192021
22232425262728
293031  

政務SEE〡惡劣天氣不停市 特首講錯實施日期兩次

醞釀已久嘅「惡劣天氣不停市」安排,今日(18日)終於由特首李家超親自宣布落實。不過,唔知係咪消息太令人振奮,特首今朝宣布實施日期嗰陣,講遲咗兩日,變成9月25日。喺記者會結束後,特首要再上台糾正,不過,喺職員「提水」下再講錯多次,之後公開表示要「矯正」返係23號。

特首李家超今朝如常喺開行政會議前見記者,佢喺開場發言表示,「我宣布港交所會喺今年9月25日起,實施新安排,證券市場喺惡劣天氣下不停市,維持運作」。佢一公布重磅消息,阿絲發現唔少傳媒行家出咗即時新聞,大部分已經將9月25日寫入新聞標題。

之後記者會如常進入提問環節,特首答完提問後離開講台,主持人宣布「記者會結束,多謝大家」。就喺李家超離開講台之後約10秒,又重新走到講台,「就係…我哋(不)停市嘅安排應該係9月20……」

呢個時候,背景有把人聲話「3號」。但特首繼續講咗係25號,不過即刻更正返「剛才我喺稿嘅時候呢,係讀錯咗,應該係9月……9月23號,剛才喺稿我讀錯咗9月25號,呢度我矯正返」。

唔知係唔係政務繁忙呢?特首仲將「不停市安排」講做「停市安排」,阿絲想提醒特首,記得注意休息啊,因為講錯嘢令傳媒報咗fake news,咁就唔好啦。

睇齊深圳 上海

今次打風照開市消息,市場都好關注。李家超話嚿年8月,政府成立咗「促進股票市場流動性專責小組」,研究強化港交所嘅競爭力,佢全部接納小組提出嘅短、中、長期建議。「惡劣天氣不停市」就係短期建議之一。李家超解釋,投資者喺新安排下,可以喺香港發出八號或以上風球、黑色暴雨警告期間,如常買賣港股同衍生產品,以及經滬深股通買賣A股。

特首仲話,環球主要股票市場,包括深圳和上海,都喺惡劣天氣下維持交易,作為國際金融中心嘅香港,「冇理由唔睇齊」。加上香港股市絕大部分都係電子交易,「冇合理理由,其他市場喺惡劣天氣下可以不停市,香港做唔到」。

林超英早年提出遭拒

講返呢個「惡劣天氣不停市」,類似討論其實唔係最近先開始,前天文台長林超英嚿年就講過,喺佢做台長任內(即2003至09年)曾經去信港交所建議「風雨不停市」,但被對方拒絕。阿絲就諗,當年香港經濟好、股市交投暢旺,當然少一、兩個交易日都無所謂啦。

當時林超英解釋,氣候變化已經發生,香港受極端天氣影響可能成為常態,市場唔應該長期受天氣因素停擺。佢希望政府做好技術配套,將股票市場運作同天氣因素脫鈎,仲可以消除市民誤解,以為天文台發出警告訊號有商業考慮㖭。

前台長真係想得周到,不過,阿絲希望政府都思慮周全,做好系統同技術準備。畢竟講錯日子可以澄清,落錯交易就麻煩囉。

相關文章

熱門文章