政務SEE〡李家超引《桃花源記》 暗示政治腐敗 逃避亂世？

特首李家超今日（13日）出席立法會互動交流答問大會，講到香港要推動文化旅遊融合嗰陣，引用東晉大文豪陶淵明嘅名作《桃花源記》，話文章令佢聯想到「宣傳嘅重要性」，仲話要將香港「打造」為「不同方面嘅桃花源」。雖然阿絲以前上堂成日瞓覺，但冇印象老師話《桃花源記》同宣傳策略有關喎，反而好似關於逃避亂世喎……阿絲驚再諗就犯法。

今日立法會嘅互動交流答問大會，第二節主題係「弘揚中華文化 推動文旅融合」。好多議員獻計唔同嘅文化旅遊路線，包括鄉議局劉業強提出發展圍村文化、選委界陳永光建議遊輪碼頭起「中醫藥文化中心」、勞工界郭偉強就話要邀請中國非物質文化遺產嘅工藝家嚟香港，「令更多外國訪港人士，唔使穿州過省，就接觸到豐富、豐厚嘅中華文化」。

唔知係唔係主題開宗明義講中華文化，特首李家超聽完議員一系列建議之後，就引用《桃花源記》話「令我聯想宣傳嘅重要性」。李家超憶述，「以前讀書我記得讀《桃花源記》，陶淵明嘅，呢個世外桃源，嗰個漁夫『蕩失路』先去到，去完之後想再去呢，搵唔到嘅……縱然係世外桃源，冇人知呢，係去唔到㗎」。

所以李家超結論係：「宣傳好重要，宣傳先知道香港係一個桃花源，但香港不是《桃花源記》，因為《桃花源記》係一個隱世嘅地方」。佢仲話，要將香港「打造」為「不同方面嘅桃花源，話俾所有人聽，個桃花源入面有幾多棵桃花、平時點生活……」

如果桃花源廣為人識，仲可唔可以成為陶淵明筆下嘅桃花源呢？阿絲唔係陶淵明，真係唔識答。不過阿絲就記得，老師從未講過《桃花源記》同宣傳策略有關，反而同政治腐敗、追求樂土有關喎。

寫作背景 百度：王朝極端腐敗 保護貴族官僚特權

翻查中國「百度」，百度話《桃花源記》創作背景係陶淵明身處嘅東晉，「王朝極端腐敗，對外一味投降……統治集團生活荒淫……賦税徭役繁重，加深了對人民的剝削和壓榨」。加上東晉王朝承襲舊制，「保護高門士族貴族官僚的特權」，令到出身寒門的陶淵明「壯志難酬」。

於是，陶淵明只好藉創作抒懷，「塑造了一個與污濁黑暗社會相對立的美好境界，以寄託自己的政治理想與美好情趣」。

阿絲再拜讀《桃花源記》，文章提到村民話佢哋嘅祖先「避秦時亂」，於是帶着妻兒嚟到呢個與人世隔絕嘅地方，至於外間之後發生咩事，「乃不知有漢，無論魏晉」，連漢朝都唔知，更唔使講魏晉朝嘞。

其實李特首講得冇錯，曾幾何時香港都真係一個「避秦時亂」嘅地方。至於而家？阿絲就唔識答嘞。