政務SEE〡倡閘口裝閉路電視及AI人臉識別 楊永杰怪招捉濫用$2優惠

面對千億財赤，財政司司長之前話要檢討長者「兩蚊」搭車優惠計劃，九龍中立法會議員楊永杰就獻計，建議政府資助港鐵、專營巴士、小巴同渡輪公司，喺出閘位置裝閉路電視，加上人工智能（AI）人臉識別技術，用嚟監察兩蚊計劃實施情況咁話。阿絲真係佩服楊議員咁有創意嘅建議，咦！不過同中國嘅社會信用評分制有啲似喎！

楊永杰喺今日立法會大會提出書面質詢，對於加強打擊違規使用兩蚊搭車優惠，提出4項建議，包括巴士、小巴設「上落車兩次拍卡」分段收費；資助港鐵、專營巴士、小巴同渡輪公司喺出閘、落車拍卡機位置裝閉路電視；應用人臉識別技術及人工智能分析閉路電視影像；同埋喺港鐵同渡輪增設$2優惠特別通道。

4項建議入面，最有「諗頭」要數第2同第3項嘞。楊議員嘅建議等如要公帑資助，喺幾乎全港所有交通工具出口處裝閉路電視，實行「未滅赤，先使錢」。而且仲要應用人臉識別同人工智能分析影像，等如至少要將全港現時超過230萬名60歲以上人士容貌資料輸入系統，所引起嘅私隱爭議都可想而知。

政府：繼續聯同營辦商特別巡查

政府就回覆，一向鼓勵巴士同小巴營辦商，盡可能提供票價優惠同分段收費。運輸署亦會調查及監查優惠計劃使用情況，聯同交通營辦商進行巡查同執法。至於楊議員咁有創意嘅建議，政府話會考慮唔同方案嘅效益，同方案係咪實際可行。

阿絲記得嚿年運輸署亦都展開過為期兩個月嘅巡查執法行動，最終只捉到1個懷疑個案。其實港大社會工作及社會行政學系榮休教授周永新早前投稿報章講過，$2優惠問題癥結，在於港府之前將受惠年齡降低至60歲，令到受惠人口大增。

周教授當時建議政府盡快做公眾諮詢，凝聚共識之後果斷修訂計劃。佢仲話$2優惠影響超過200萬市民生活，「任何改動不能單看財政負擔，也要顧及受惠市民的感受和需要」。

若然為咗可能極少數嘅濫用個案，使大筆公帑嚟安裝閉路電視同人臉識別系統。阿絲覺得，不但唔可以「對症下藥」，仲難免令人覺得係「項莊舞劍」囉。