週一 週二 週三 週四 週五 週六 週日
 12
3456789
10111213141516
17181920212223
24252627282930

政務SEE〡學者政府激辯旅遊業 袁彌昌:諂媚式救亡 辛苦為誰忙

啱啱過去嘅「五一」黃金周,政府話有76萬人次訪港,帶動20億元消費。嘩,阿絲聽到個數字都好興奮呀!不過, 學者袁彌昌噚日(7日)就喺報章「潑冷水」,話「旺丁不旺財」、旅客除咗「打卡與批評之外,不帶走一片雲彩」,仲暗示政府缺乏長遠眼光𠻹。文體旅局長楊潤雄當然不甘示弱啦,直斥係「謬論」,仲批評言論係漠視業界工作成果。相嗌唔好口,阿絲睇完兩邊論點後,想勸一句:「打和,Super!」

戰略研究學者袁彌昌噚日(7日)喺《明報》撰文,話香港旅遊業正處於「震盪與迷失」之中,旅遊業「旺丁不旺財」,嚟嘅遊客「除了打卡與批評之外,不帶走一片雲彩」,經濟效益少之又少,更有「一場辛苦為誰忙」之感。佢仲用親身經歷,話「五一」期間,喺銅鑼灣見到某百貨公司「感謝祭」人頭湧湧,其餘地方遊客只比周末多一啲,「不過大多只在打卡閒逛閒坐,明顯是不會消費……連坐下來喝杯咖啡也省掉」。

批港府諂媚式救亡 予人冇底線、好low印象

跟住袁彌昌仲毫不留情咁話,港府「正處於一種臨渴掘井、藥石亂投的狀態,明顯是方寸大亂」,想要「諂媚式吸客救亡」,覺得旅客要乜就俾乜,「事實上,這只會給人一種沒底線、『很low』的印象」。袁話呢種現象稱為「內捲化」,佢解釋話「意指一種模式達到其最終形態後,無法自我穩定,也無法轉變為新形態,只能使自己在內部更加複雜化」。

逐漸失個性 失本來面貌與形象

阿絲唔識理論嘢,袁生舉例話「政府整天追逐這些網紅店和景點,誤以為這就代表深度遊」,結果嚟香港嘅大部分係低消費旅客,搞到市面由低成本、低增值商店主導,係「劣幣驅逐良幣」,趕走高成本、高增值店舖。

正如餐飲業出現「網紅店升天,米芝蓮店結業」嘅弔詭現象。袁生仲話,香港旅遊業「正逐漸失去個性,失去其本來面貌與形象」,如果政府繼續向呢種旅遊模式傾斜,將會係一條「不歸路、一種退化」。

不過袁生嘅文章唔係有彈冇讚嘅,佢話香港有大把米芝蓮餐廳,勁過唔少國際城市;香港嘅雞尾酒酒吧正迅速冒起,有啲榮獲「亞洲50最佳酒吧」。而且,南韓國民近年大舉外遊,係一個龐大市場。不過,佢就話睇唔到政府有重視過,同提出咩發展策略。最後,袁生總結話,「從振興旅遊業一事中,可看出一個政府的水平高低、有否長遠眼光與策略、社會和業界的問題出在哪裏……值得大家警惕」。講得咁白,阿絲都驚佢會唔會直接得滯。

楊潤雄:謬論 以偏概全妄下定論

面對袁生咁尖銳嘅批評,文化體育及旅遊局局長楊潤雄就化身「旅遊業反駁隊」,噚晚喺facebook不點名回應,話雖然黃金周唔能夠惠及每一個商戶,但據佢了解,業界大致滿意。佢話「絕不認同」港府係諂媚式迎合低消費客,仲鬧「一場辛苦為誰忙」、「劣幣驅逐良幣」都係謬論。

楊局長話,大家都知每150萬旅客,就為香港生產總值提升0.1%,今次黃金周76萬人次訪港,就帶嚟超過20億消費。「況且過門便是客」,香港必須為旅客提供優質旅遊體驗,希望佢哋下次再光臨。貼文仲批評袁忽略政府同業界嘅努力,「漠視人家工作成果,以偏概全妄下定論」,呼籲大家唔好被誤導咁話。

睇完咁精彩嘅筆戰,阿絲就覺得,港府固然好積極爭取中國遊客啦,連「日夜都繽紛」、「月月放煙火」都諗埋出嚟。但袁生講嘅「逐漸失去個性,失去本來面貌與形象」,又何止係旅遊業呢?如果政府堅持只係睇自己想睇到嘅嘢,其實呢場辯論始終對唔到嘴。所以,都係打和啦!

相關文章

熱門文章