政務SEE〡年斥千萬元推廣同鄉文化 議員紛紛申報祖籍

立法會民政及文化體育事務委員會今（25日）舉行會議，討論嚿年特首李家超喺《施政報告》提出嘅「同鄉文化推廣計劃」，計劃預算喺未來3年內，預留3,000萬元俾香港各個同鄉社團申請，舉辦推廣家鄉文化的活動。

發言嘅議員全部贊成計劃，當中絕大部分議員都先申報所屬嘅同鄉會，其中最「架勢」可算係專業動力議員林素蔚，佢發言先申報：「我係多個同鄉會嘅成員、理事、咩會董顧問等等」，跟住更加厲害嘅係「作為愛國愛港小粉紅，呢個計劃一定支持啦！」

林議員跟住自稱係「地地道道客家人，我自己好鍾意食嗰啲客家茶粿，我每個禮拜都入西貢工作，噚日入咗去，聽日又入去，咁就買吓客家茶粿、雞屎藤……」

跟住發言申報嘅係民建聯議員林琳，佢發言先解釋複雜身世：「我喺（河北）邯鄲出世，爹哋係福建人嘅華僑喺緬甸出世，我媽咪係山東人」。聽到阿絲都要諗一諗個關係圖要點畫。

不過阿絲就最認同民建聯議員陳勇，佢話：「大家向上申報嘅話，大家都係炎黃子孫」。啱啊，大家都係中國人，唔使分得咁細啦！