政務SEE｜建制「𥄫實」公僕 指性教育教材「軟對抗」、「左到盡，由政府畀人鬧」

教育局「公民、經濟與社會科」性教育教材被評過時、離地，今日《信報》專欄就引述政圈中人認為有人「軟對抗」噃，阿絲都驚一驚，話晒呢期都食咗唔少「花生」又寫過幾篇報道，點知原來係話寫教材嘅公務員團隊。不過行會召集人葉劉淑儀就唔係幾同意喇，話官僚始終係「古板」多過「古惑」喎。

《信報》專欄引述資深建制人士表示，懷疑有個別執行層級嘅公務員，刻意喺寫教材時「有咁盡去咁盡」，製造機會畀反政府人士大做文章。又有全國政協委員指，公僕有唔少「黃絲」，如果佢哋將政府立場上綱上線、令政府出醜，高層好難察覺咁話喎。有政協委員就話「係人都知羽毛球場難book」，又話未成年人士進行性行為本身就違法，要求學生簽承諾書根本係畫蛇添足。

有官員仲煞有介事咁解讀「軟對抗」現象，建制派唔少人亦已「𥄫實」政府嘅「軟對抗風險」。有政界中人話，唔止性教育教材，早前宗教課程指引，將「不可作假見證」嘅基督教義，演繹成「明辨媒體」，引起宗教界反彈，都有人懷疑負責寫教材嘅公僕故意「左到盡，由政府畀人鬧」。

阿絲唔係好知「左到盡」嘅意思係咩，但如果「左」會令政府畀人鬧，咁係咪應該去返右邊呢？今次真係向左走向右走喇，今時今日做公務員，認真「左右做人難」啊。

睇返份教材，其實係由教育局發展處「個人、社會及人文教育組」，委託香港都會大學「教育及語文學院」製作嘅，呢個學院1992年創辦，主要提供師資培訓同語文教育課程。

不過咁，委託大學寫教材，教育局都係要「守尾門」嘅。行政會議召集人葉劉淑儀就話，世界各地都有唔認同自己政府嘅人民，只要唔違法就唔使大驚小怪，仲話要全體港人愛港愛國、支持政府，需要時間。呢方面阿絲非常認同，如果要為呢段愛加上一個起點，我希望係一萬年後。

葉太仲話傳媒鍾意寫有話題嘅文章好正常，唔應該視為「軟對抗」，阿絲見到葉太呢句，都真係有啲眼濕濕，終於唔使擔心過去幾日寫嘅係「煽動文章」喇。話晒葉太都曾經係公僕，佢都忍唔住講咗幾句，認為教材風波未必係有人「玩嘢」，仲話「官僚始終『古板』多過『古惑』」。

古板又好，古惑又好，今時今日喺政府做嘢實在如履薄冰，唔係畀人「扣帽子」話係軟對抗「左到盡」，就係因為宣咗誓所以移唔到民，以前鐵飯碗就係想公務員安安份份為政府為巿民服務，依家就日日心驚膽顫，乜絲都好喇，阿絲覺得大家都係想返工啫，係咪？