政務SEE｜中國護理員申請來港打工遇黑中介 香港淘金夢碎

近年香港各行各業都出現人手荒，尤其是院舍護理員，政府2023年推出院舍輸入護理員特別計劃，明年配額就會達到1.5萬，業界指未來10年需求會大增，預料安老業會用盡配額。不過騙徒手法層出不窮，官媒深入中國廣西，報道「黑中介」點樣協助外勞申請來港工作，伺機呃中介費，之後「着草」失蹤。

《文匯報》話喺有「護理員搖籃」之稱嘅廣西，香港院舍輸入護理員特別計劃（計劃）掀起應聘潮，有人甚至為咗畀中介費而借錢，渴望嚟香港實踐「淘金夢」。但呢個人力巿場，就畀騙徒睇中咗，有最少10間家政培訓公司、3,000名護理員誤信中介，每人交咗1.3萬至3萬人民幣（下同）中介費後，苦等逾一年，中介竟然攞埋啲錢「着草」，業界相信受騙金額高達6,000萬！

記者喺廣西搵到一個苦主，佢話原本以為可以嚟香港做嘢，收至少每月1.5萬港幣人工，就還到中介費，點知到依家工又無影，反而欠債，仲要畀利息。咁成班苦主就去搵一個叫珊珊嘅中介啦，點知珊珊原來只係「下線」，佢都喊冤話自己誤信一間叫啟源國際（香港）顧問嘅中介，自己都係打工，無諗過錢又賺唔到，老闆又着草。

身懷六甲嘅珊珊仲同記者哭訴，每日都要面對無數咁多人嚟討債，中介費一蚊都無落過袋，佢只係負責物色護理員，好似層壓式推銷咁，大部分中介費已上繳。不過原來佢都係擁抱「香港淘金夢」嘅一員，佢喺疫情期間曾申請來港做護理員，但最終落空，同批入選嘅姐妹3個月後回鄉，每人有成7萬人民幣收入令佢非常羨慕。

嚿年香港又招募護理員，佢就四圍打探應徵渠道，識咗啟源嘅員工，點知畀人呃咗去呃人，對方慫恿佢幫啟源做獵頭，話每收一名應徵者中介費，就有2,000至4,000蚊回佣。佢話經手嘅赴港護理員涉及482人，中介費總額465萬，不過自己就分文未取。

黑中介香港註冊 苦主呻「赴港打工」猶如「電騙」

而呢間啟源國際（香港）顧問嘅董事係一個叫鄧潤強嘅香港人，公司2024年10月先喺香港註冊，公司登記地址係秘書公司，借地址畀客戶註冊同收信。

呢間顧問公司喺香港同中國都有註冊，報道話有2,000名外勞向啟源繳交共5,000萬蚊後再無下文。啟源向受害者提供嘅僱傭合約、香港入境處審核通知等文件，都有好多錯字，疑似係改圖。

苦主阿蓮就同記者講，當時啟源出示所謂嘅僱傭合約同入境處文件，以為對方真係有辦法幫佢申請嚟香港打工，就交咗幾萬蚊報名費，但等咗大半年都未有動靜。佢就開始起疑，向聲稱會請佢嘅「僱主」查詢，點知對方話呢個職位從未請過外勞，又發現入境處文件都係偽造。原來嗰啲所謂嘅招聘廣告，係請香港本地居民而非外勞。呢鋪真係改下圖，就呃到幾千萬喇。

除咗護理員中招，負責培訓護理員嘅家政公司都誤信中介，例如南寧樂智家政就被騙中介費2,000萬，涉及近千人。另一名被騙嘅南寧珍心家政公司負責人就聲稱被騙近百萬中介費，而且呢次已經係佢第三次被「赴港勞務中介」詐騙。佢話詐騙方式花樣新又多，防不勝防，「『赴港打工』堪比『電騙』」。