3D地圖「看見香港」 多角度睇立體城巿景觀

地政總署今（20日）推出九龍中「可視化三維地圖數據集」同「Open3Dhk」嘅線上平台，可以用俯瞰嘅方式睇3D版香港，無論天橋、樓宇、公園都睇得好清楚，政務絲試用完，覺得有少少似迷你香港模型，連大廈廣告板細節都保留到，地政署話呢個可視化三維地園用先進嘅測繪技術，做出高精確度同像真嘅3D城巿模型。

呢個線上平台暫時可以睇到九龍中同九龍東兩個地區，以東鐵線旺角段做分界，鐵路左邊旺角未有3D圖，但過咗鐵路嘅何文田就睇得到喇，一直伸延到長沙灣蘇屋邨、九龍城、獅子山下嘅黃大仙、彩虹。

而且仲有「第一身視角」功能，可以調教你所在嘅高度，從高空睇又得，「貼地」睇都得。現時兩個地區，大約可以睇到9500幢建築物同210個設施，行車同行人天橋，連隧道都睇到。

線上平台仲睇到行山徑同單車徑，行山徑以地區、難度同步行時間分類，除咗顯示山徑上嘅標距柱編號、廁所位置、巴士站位置，仲有山徑的側面剖視圖，睇到上落山嘅坡度有幾斜，每條山徑仲有一段簡單嘅介紹添。

而單車徑就顯示咗可以泊車嘅位置同埋可停泊數量，對於鍾意戶外運動或需要用單車代步嘅人嚟講，都係幾方便嘅。地政總署就話，預計2024年第三季就會完成覆蓋全港嘅可視化三維地圖。

阿絲本身就無思鄉嘅，但見到個立體嘅香港同埋獅子山，就立即有少少掛住香港，尤其是佔全港四分三面積嘅郊野公園，惟有睇3D地圖止住渴先喇。