工聯會推「Yes Hong Kong」 觀塘碼頭搞避風塘風情區

個個都話搞夜巿，唔通個個都去搞夜巿咩！近期政府努力sell夜巿，想要「搞活搞旺」夜經濟，一時又話搞巿集，一時又話要求商場延長營業時間，噚日工聯會就發表「觀塘海濱花園夜巿發展項目建議書」，建議喺觀塘海濱花園搞夜巿，仲話要重建珍寶海鮮舫，設立「避風塘風情區域」賣避風塘炒蟹、「啟德網紅觀光橋」咁話。

又風情區、又網紅橋，淨係聽個名，就已經覺得五光十色喇。工聯會建議夜巿命名做「Yes Hong Kong」，話係食「夜巿香港」諧音，好有心思喎。佢哋建議觀光夜巿分幾個區域，草地就畀遊客觀景同休閒，仲可以劃啲區出嚟畀街頭藝術家表演。

而天橋底嘅地方，佢哋就建議可以做「綜合性嘉年華場地」，起間「香港工業博物館」話吓當年，展出香港早期製造業全盛時期、觀塘工業區嘅昔日風光，阿絲非常支持啊，昔日香港真係好風光嘅。

佢哋話珍寶海鮮舫喺嚿年沉船，搞到香港人唔開心，於是想喺海濱花園重建，仲好興奮咁解釋，復活珍寶海鮮舫搞旺夜巿，一定有人肯投資，話做個迷你版都得，叫大家去飲茶、食飯、影相。工聯會旅遊聯業委員會主席林志挺就話，項目係要發展成為「世界級的旅遊觀光點」，佢仲話海濱可以設花店，啲男朋友可以喺夜巿即場求婚，男士們學嘢喇。

橋底精彩，橋上都唔輸蝕，佢哋建議建造一條連接海濱公園同啟德郵輪碼頭嘅「啟德網紅觀光橋」，聲稱可以成為「夜巿地標網紅打卡地」，林志挺就話可以帶旺啟德郵輪碼嘅人流同解決交通問題。不過唔知林生有無諗過海上交通問題呢，嗰個海域泊咗唔少郵艇，而且北角碼頭、啟德郵輪碼頭同觀塘碼頭之間都仲有渡輪行駛㗎。

教授撰文指討論「噏得就噏」 商界事無大小要政府出手

當政黨同政府都好努力想搞夜經濟之際，學者有唔同睇法。今日香港教育大學客席研究講座教授呂大樂就喺《明報》撰文，指出社會各界紛紛「出謀獻策」，方案太多，當中「噏得就噏」嘅亦為數不少。

呂教授對工商界背景嘅政黨跌眼鏡，以為佢哋會提出一啲踏實、具經營生意眼光嘅具體建議，點知呢啲建議竟成為茶餘飯後嘅笑話，完全係「噏得就噏」嘅代表作。佢仲批評工商界竟然面不改容咁「搭便車」，自己做唔嚟就問政府幾時出手。

教授分析，曾幾何時工商界視社福界為「洪水猛獸」，覺得佢哋成日要求政府派福利，點知到咗今日，「經過一番完善後」，商界竟然反過嚟變成「伸手牌」，事無大小都要政府出手。教授忍唔住話，自己唔敢講咁喺不思進取，「但就真的明顯地太懶惰了」。

商界「伸手」，教授認為似乎又好配合政府「乜都有佢份」嘅定位，佢覺得出現店舖留唔住客人嘅情況，政府第一時間應該探討巿面成功個案、佢哋反映咩狀況、對社會有咩啟示。佢認為要多做調查研究，先能夠了解問題嘅本質，唔係一窩蜂咁「噏得就噏」。

佢分析，喺咁熱烈嘅討論中，充斥住「以結果為目標」嘅思維，香港突然變得「好等錢使」，「懶得思考不同選擇所涉及的（經濟、社會）成本，總之要「搶錢」、「搶人（消費者）」。當大家只係諗緊點樣喺短時間內令「夜香港翻生」，教授就拋出咗幾個真正應該研究嘅問題，包括夜巿喺經濟上嘅可持續性、點樣評估措施嘅效益、政府嘅「有形之手」要伸幾遠、商界點做好自己生意等。

佢認為現時呢種「過度活躍」嘅公眾議論「效益很低」，不過「樂在其中的，大有人在」，阿絲都不得不承認，旁觀政商界層出不窮嘅「創意」，都真係好多樂趣囉。