【有片】政務SEE｜何君堯：我𠵱家先睇文件…通常

香港政府重塑立法會後，財務委員會今日（1日）出現「尷尬」一幕，話說議程討論「2023/24年度司法人員薪酬調整」，輪到選委會界別議員何君堯發言時，佢突然翻看文件附件，問署理行政處長任雅玲，各級法院法官人工係幾多，對應「司法人員薪級表」屬於邊一級。

法官幾錢人工，簡單上網查就知嘅，就喺會議廳寂靜一片，等待任雅玲揭文件解答問題之際，財委會主席陳振英打破沉默，「何議員啊，其實呢啲嘢呢……你喺財委會之前早啲遞訊息入嚟……好過大家肅靜地等任署長『摷書』囉！」

何君堯突然自爆：「多謝多謝……因為我𠲖家先睇文件……通常」佢講完仲笑住咬一咬唇，跟住即時補飛：「但文件一早做咗啊嘛！」

阿絲睇返資料，立法會議員10月獲加薪1.9%，「通常𠲖家先睇文件」嘅何議員最新月薪係10.7萬㗎啦。而今次方案建議司法人員由今年4月1日起加薪3.62%，議案最終獲得通過。