政務SEE｜李家超下周飛秘魯參加APEC 歐洲轉機避開美國免政治風險

平時逢星期二朝早都會見到特首李家超行會前見記者，今朝唔見特首，阿SEE有少少掛住佢𠻹。原來阿John去咗上海參加「中國國際進口博覽會」，《星島》大棋盤噚日報道，特首仲會喺下星期飛去秘魯利馬參加亞太經合組織（APEC）領導人非正式會議。外訪唔出奇，不過報道就話香港無直飛馬利航班，只能美國轉機，但特首因為畀美國制裁緊，所以可能要改喺歐洲轉機喎。

一聽到特首話因為受制裁所以唔敢喺美國轉機，阿SEE即刻諗起好多流亡港人，都唔敢喺香港轉機。記得曾經訪問過一名流亡美國嘅港人，佢話每次飛亞洲地區都會好小心，除咗一定唔會揀喺香港轉機嘅航班，連會經過香港空域嘅機都唔會揀，每次都會好小心研究班機嘅飛行航道。

《星島》報道就話特首已確認參加2024年亞太經合組織（APEC）領導人非正式會議，會議定喺15至16號舉行，據悉李家超將率領部分官員喺12或13號從香港出發，飛到秘魯利馬，出訪約一星期。

不過好可惜香港同利馬係無直航嘅，所以一定要轉機至少一次，大部分人都會選擇喺美國轉機，例如紐約、洛杉機，全程要成30個鐘以上。但因為阿John依家仲係「被美國制裁之身」，如果喺美國轉機，有可能惹嚟不必要麻煩。報道話政府意識到呢個問題，所以揀航班時，特登揀啲避開美國嘅航班，或者會揀喺歐洲轉機，例如西班牙馬德里、荷蘭阿姆斯特丹或法國巴黎。

如果大家仲記得，嚿年11月APEC會議喺美國三藩巿舉行，雖然特首話自己收到邀請信，但最終由財政司司長陳茂波「代為」出席，當時有人推測李家超因受美國制裁而避免前往。

噚日個報道仲訪問咗全國港澳研究會顧問劉兆佳，佢話美國制裁令只涵蓋入境，過境理論上唔受限制，但美國奉行「長臂管轄」延伸法律影響力，加上地緣政治因素，下周又適逢大選後不久，中美關係變數多，佢認為李家超過境美國，有機會受政治干擾或有潛在麻煩咁話，所以取道歐洲喺政治上係明智選擇。

講返嗰位唔可以喺香港轉機嘅朋友，佢如果去台灣公幹，都會喺桃園機場搵飛去香港嘅登機閘口坐吓，點解？因為可以望吓即將飛返香港嘅機，又可以聽吓身邊嘅香港人用廣東話傾偈，可以幻想吓自己將會同佢哋一齊上機、返屋企，寫到呢到阿SEE都有啲眼濕濕。所以呢，唔好話轉機喇，大把香港人返唔到屋企啊，唔可以喺美帝轉機？小事喇，支持阿John對美國制裁嗤之以鼻啊！