民政專員歡送會｜CY：官場活動「娛樂圈化」 屈穎妍：高官議員吃到胖

黃大仙民政專員黃智華上星期四晚嘅「赴京深造聯歡晚會」，筵開43席，連中聯辦都有派代表出席，座上仲有區內40幾個校長，好多地區人士又送字畫、墨水筆啊咁，事件惹嚟非議，據聞北京對呢件事唔係太高興，覺得損害香港社會對「愛國者治港」嘅信心。事件持續發酵，特首李家超噚日就話，事件本意係好，但宴會嘅規模令人產生負面觀感，話官員應該引此為鑑，日後可以用更直接嘅方法多謝官員，例如寫信、email，政務絲我好同意，地區人士做吓「寫信師」其實都幾浪漫吖，唔一定飲飲食食啫。

前特首、全國政協副主席梁振英高度重視呢單嘢，星期六撰文批評近年建制社團「浮誇浪費之風日益嚴重」，必須剎止，仲話社團愈嚟愈多，「飲飲食食無日無之，應邀赴會的官員級別越來越高，人數越來越多」，佢好痛心食物同酒水無人問津，轉眼變成廚餘。仲反問呢種晚會啲錢係點嚟、有咩回報、政治效果係正定負面。

佢兩日前繼續關注事件，話作為公僕，將工作做好係應該，無必要成為幾百人宴情嘅主角，「香港納稅人沒有在薪酬和福利上待薄過公務人員」。以為事件會慢慢降溫啦，點知佢噚日又再發功，狠批近年嘅官場活動「娛樂圈化」，由背景板、場刊題詞、典禮程序，到司儀、攝影師，都有唔少睇法，不過講到底，佢都係覺得建制派唔生性，苦口婆心勸建制團體做實事啫，仲話「檢查白貓黑貓工作」嘅標準，唔係形式同排場，而係「抓老鼠」嘅膽量同能力，要建制派自我革新同提升實力。

阿絲就覺得，又唔怪得晒啲社團嘅，話晒「完善地區治理制度」後，民政專員會兼任區議會主席，可以影響「三會」、委任同埋間選區議員嘅人選，權力大增，個個都話佢哋係「地區小特首」，專員手握資源、人事任命大權，但一方面又要拉攏地區人士支持，完善地區治理後，兩者成為真正嘅「命運共同體」喇。

建制派「健筆」屈穎妍今日就撰文，為黃智華「伸冤」，引用諺語「殺君馬者道旁兒」，故事講有人騎着好馬，旁人稱讚問馬可唔可以再跑快啲，騎者聽後出力鞭策，最終好馬力竭而亡。屈穎妍話在旁拍掌嘅人反而害咗隻馬，近日輿論矛指直指黃智華，言下之意，地區人士對黃嘅「厚愛」反而害咗佢。

屈穎妍又話，近年政府高官同立法會議員都有個共通點，就係坐正後發福，「全部都是吃到胖」，話有人可以一晚趕十幾場，真係聽到都覺得攰。佢仲爆真實笑話，「有特首出席某社團活動，上台發言時，望向台下一眾出席典禮的高官，感慨說，平日我們開會都沒這麼齊人！」阿絲諗起早前有報道指，立法會有三分之二嘅法案喺表決時，出席議員人數未達法定要求，就真係笑唔出囉。