政務SEE｜牛肉飯店、中國串燒連鎖店開舖 政府都要出新聞公報？

「來自東京著名連鎖牛肉飯專門店『松屋』位於佐敦首間門店將於8月11日正式開幕，顯示對香港的餐飲業前景充滿信心」……唔好以為阿絲收咗錢寫廣告啊！呢兩句係今朝政府新聞公報嘅文稿嚟㗎。作為記者成日mon住政府新聞網就好正常嘅，因為隨時都要睇吓政府有咩重要公布，例如強烈譴責外國政府、政要啊咁，不過近月好似多咗啲關於食店開業嘅消息噃，睇嚟政府對牛肉飯、拉麵店、串燒店喺香港開舖非常重視啊！

好似今朝11點出嘅呢篇「日本連鎖牛肉飯專門店『松屋』開設首間香港店」為例，開首寫明餐廳「對香港餐飲業前景充滿信心」，第二段就有投資推廣署助理署長話對方落戶香港「印證」佢哋對本地飲食巿場嘅支持同信心。

除咗牛肉飯、今個月1號有「日本大阪燒連鎖餐飲店在香港開設首間門店」，6月27號就有「新日本拉麵品牌橫濱家系『町田商店』落戶香港」，兩份新聞稿都開宗明義講，呢兩間餐廳係嚿年4月香港駐東京經貿辦同投資推廣署合辦香港考察團嘅配對結果。認真係「說好香港故事」噃。

繼續睇返之前幾個月，4月9號政府新聞稿有一單係「內地串燒連鎖店進駐藉香港國際地位拓展海外業務」，係投資推廣署協助中國串燒連鎖店「木屋燒烤」喺旺角開店。

出稿誇餐廳對港餐飲業充滿信心 兩個月即爆食物中毒

木屋燒烤香港巿場負責人當時話：「香港擁有簡單透明的稅制和低稅率，營商環境優越，且充滿活力，能吸引到世界各地人才，是木屋燒烤走向國際的第一步，也是公司實現『千城萬店』願景的重要跳板」。呢間中國連鎖燒烤店好似好勁咁噃，喺北京、上海等地有超過400間舖，仲話香港舖係「負責商業模式規劃」同「測試品牌全球化」嘅重要基地咁話。

但好可惜，呢個香港故事講唔到落去喇。開業兩個月，木屋燒烤爆發食物中毒事件，8人分別喺6月19至21號期間，喺餐廳食咗烤蠔同烤羊串，之後出現嘔吐、腹瀉同發燒等病徵，可能由諾如病毒或沙門氏菌引致。食安中心人員24號去餐廳視察，指示佢哋暫停出售相關食品同消毒餐廳。不過有記者發現，之後一日即25號，餐廳仍有賣相關食物。

當時投資推廣署助理署長就喺政府新聞稿講，木屋燒烤進駐香港不但反映佢哋對香港餐飲業充滿信心，仲顯示佢哋想藉香港拓展國際業務嘅決心。估唔到咁快出事，唔知食物中毒事件會唔會打擊消費者信心，進而打擊佢哋對香港餐飲業嘅信心呢？阿絲就覺得香港人太「玻璃肚」，人哋400間分店，咁多同胞食過都安然無恙，偏偏喺香港開業兩個月就出事。

睇政府新聞公報，阿絲覺得香港現時欣欣向榮，心感欣慰。不過睇返數據，似乎商舖「執笠潮」未止噃，中原（工商舖）數據顯示自嚿年下半年起，中環、銅鑼灣、尖沙咀等地區商舖空置率係5%至10%。當中尖沙咀係重災區，空置率持續緊貼10%。哎，阿絲之前見到栢麗大道十室九空，即使有開門嘅，金舖變成「夾公仔機舖」，個心都真係乸住。阿絲仲聽講有舖位租金劈價超過5成，但仍乏人問津。