週一 週二 週三 週四 週五 週六 週日
 12
3456789
10111213141516
17181920212223
24252627282930

政務SEE|文匯記者放蛇一拳書館 偷拍活動、書店內部

「一拳書館」上星期一喺Facebook透露,原本計劃喺一間學校辦小書展,點知被匿名投訴而被迫取消。今日(6日)《文匯報》就用一整版報道,話一拳係「黃書店謀『軟對抗』借讀書會滲校園」,仲去書館「放蛇」偷拍活動同店內情況㖭,個專題繪影繪聲,真係做得好詳細噃。

據放蛇記者描述,一拳書館已經無再賣「反中亂港」書籍,不過「渲染黑暴」嘅「暗示性文宣」就「充斥」室內唔顯眼嘅角落,記者仲好眼利,見到館內貼住「請勿攝影」嘅語句,咁當然佢就唔會咁聽話喇,仲話呢句係「為咗防止自己掛羊頭賣狗肉嘅行徑被曝光」。

記者除咗偷拍活動講者同參加者,亦有偷拍店主龐一鳴,仲影咗一個印有「還政於民」等字句嘅袋,配以「一些暗示性煽暴文宣作品,在書店內隨處可見」文字說明,不過記者可能影得太趕,網上版竟然唔小心連自己對腳都入埋鏡,白色短襪配黑色布鞋藍色鞋帶,阿絲覺得,如果配黑色襪仔應該會襯啲。

報道話「黃絲書店」一拳書館過去幾年「劣跡斑斑」,反修例事件期間「千方百計」滲透校園,喺學校搞讀書會,「企圖以軟性方式取得青年學生信任」。近日想喺一間中學辦書展,被匿名投訴後「大肆炒作」,「抹黑校方甚至污衊特區政府打壓書店」,話書館企圖挑起社會反政府情緒。

咁其實發生咗咩事呢?一拳書館原本會喺一間學校辦「推理小說」主題小書展,但因為被投訴而取消,書館喺上星期發文話:「東野圭吾、Agatha Christie、陳浩基、福爾摩斯都感到莫名其妙,以推理為主題的書展會有多大逆不道?」更指現今社會「對人不對事已成常態」。

一拳小編感慨,同事們埋頭苦幹手挑書單、書館真金白銀訂好嘅書籍,一切都付諸流水,合理與否已無需討論,只能夠「學習新世界的日常」。學校書展搞唔成,書館就決定自己搞,過去一星期做咗個「一拳推理周」,推理迷店員仲有駐場分享,呢個係私人活動,參加者一定要預先報名。而文匯記者放蛇嘅活動,就係其中一場推理小說分享會。

推理小說好得人驚咩?阿絲都好鍾意睇推理小說,本格派睇得多,個人轉數會快啲; 社會派好多時唔只推理,仲會揭露人性陰暗面,香港作家陳浩基就係阿絲最愛。如果推理小說都可以係軟對抗,咁有腦袋、懂得思考應該就係鐵一般嘅硬喇。

報道續指以「文化包裝」嘅組織喺校園同社區「散播危害國家安全訊息荼毒學生」,訪問咗教聯會副會長鄧飛同香港中文大學工程學院副院長黃錦輝,被訪者話教育局應建立「白名單」,「杜絕反中亂港訊息滲透校園」,仲要有培訓提升老師同學校對國安風險嘅敏感度。

阿絲就覺得,有「黑名單」都已經好足夠,唔使另外又整張「白名單」喎,反正張白單應該都唔會長喇,來來去去咪都係嗰幾間。過去幾年,阿絲覺得教育界嘅敏感度已經超乎想像嘅高喇,大家都好小心保守安全,安全係數非常高,其實… 白色嘅,又點只係名單,仲有一樣叫恐怖吖嘛。

相關文章

熱門文章