政務SEE｜山姆超巿連爆食安問題 牛奶盒驚見「黑色蟲卵」 鮮肉月餅食出「牙」

香港經濟近期唔多好，零售餐飲業日日牙痛咁嘅聲，除咗有境外勢力抹黑之外，其中一大原因就係唔少港人鍾意北上消費，尤其是去大型超巿，貪佢哋夠平又夠大份。不過最近港人至愛嘅山姆超巿，就連環爆出食物安全問題喇，早兩日先有人喺山姆買嘅月餅食出「一隻牙」，今日又被人揭發喺牛奶盒上驚見「黑色蟲卵」。淨係睇相，都已經想嘔。

有報道指一位姚先生三日前喺深圳前海山姆會員店，買咗一箱牛奶，牛奶盒上寫住「德國原裝進口」字句。返到屋企打開後，發現裏面有浸過水嘅痕跡，牛奶盒表面竟然有密密麻麻嘅黑色粒狀物體，睇真啲，竟然係一大堆黑色蟲卵，真係好恐怖啊！山姆嘅員工就回覆，話會將呢個批次嘅商品撤下，全面展開調查。

事件爆出後，成為網上熱話，有買咗同款牛奶嘅網民就話，山姆牛奶唔係第一次出事，仲有網民話山姆嘅品質控制同售後服務好差，「每次下架都冇畀消費者一個合理嘅解釋」。

正所謂一不離二，江蘇一名女子前日拍片話自己喺當地山姆超市買嘅「鮮肉月餅」，食出「一隻牙」。超巿工作人員回應話管理層處理中，當地巿監部門就表示已介入事件。網上影片所見，嗰隻暗藏月餅嘅牙，都唔算細噃，有半隻拇指咁大，而且似係一隻大牙。阿絲覺得，呢位員工甩牙咁痛都仲返工整餅，認真敬業樂業，想同佢講聲，香港嘅專才計劃非常歡迎呢啲人才㗎。

中國傳媒搵到月餅生產商，廠商負責人劉女士話，生產程序有碎肉、X光檢測等環節，冇可能將牙齒類異物包入月餅，佢仲透過山姆向食出隻牙嗰位女子提出，將隻牙攞去檢驗，但畀佢拒絕。

上月18日，深圳又有消費者爆料，話喺山姆會員超巿前海店買咗一盒烤雞，食到一半，喺烤雞中發現一粒子彈狀異物。山姆回覆話供應商機器上冇呢個零件，生產環節亦無問題。不過，喺投訴平台同社交平台，都有消費者話曾經喺山姆烤雞食到異物。

山姆超巿近年連環爆出食安問題，今年2月，因生產、銷售不合格產品冒充合格，畀上海巿監局罰款8,870元（人民幣，下同）；今年1月因袋裝「牛奶巧克力」有兩個生產日期，包裝有被擦拭痕跡，畀北京巿監局罰款5,000元；嚿年10月又因虛假或涉誤導嘅宣傳，被罰款10萬元；嚿年8月，因多款商品含有異物，被罰款8.5萬元。類似新聞仲有好多，未能盡錄。爆咗呢幾單嘢之後，唔知仲有冇「死士」繼續北上超巿消費呢？