政務SEE｜立法會公布不記名調查 有議員要求加薪2成 任滿酬金袋多100萬

上禮拜公務員薪酬趨勢調查出爐，最多加薪5.47%已經引起唔少討論，但原來有立法會議員心頭更高噃。立法會公布一份不記名問卷調查，有一位議員表示應該加薪20%；亦有一位議員表示任滿酬金，應該由現時任期內所得酬金總額15%增加到35%。阿絲按議員大約10.7萬月薪計一計，等於呢位議員想卸任後袋多100萬酬金離場喎。

立法會最近檢討議員酬金及工作開支償還款額，仲向議員做咗份問卷調查，有71位議員回覆。被問到每月10.7萬月薪水平點睇？有66位話冇意見，有3位話要跟通脹嘅「甲類消費物價指數」調整，有1位話可考慮增加冇其他收入來源嘅議員酬金。仲有1位議員話，應該加薪20%𠻹。

如果成事，即係月薪由10.7萬加到12.8萬，每月加多2.1萬。雖然加薪係每個打工仔嘅心願，但阿絲真係唔夠膽同老細要求加薪兩成囉！究竟係邊位議員咁「勇武」？唔知下禮拜四（30日）開會討論議員酬金時，呢位議員會唔會企出嚟呢？

問卷另一條問任滿酬金比率，有69位議員話冇意見，有1位要求由15%提高至35%。唔好睇少呢個增幅，因為35%任滿酬金，係計算議員立法會任期內所得酬金總額。即係月薪10.7萬乘12個月，再乘4年任期，再乘以35%，足足係179萬。所以增加20百分點任滿酬金，等於袋多100萬落袋㗎。

不過，公平啲講都係極少數議員要求大幅加薪、加酬金比率，相信通過機率極微，但情況都相當尷尬。事關不久前先有議員話政府財困，要求公務員減薪。點知而家有議員要求加薪2成，又有人想卸任袋多100萬離場。

醫療津貼方面，有一位議員要求比現時每年3.7萬增加一倍，另外一位就話每年要加到5萬蚊，仲有一位議員話應按年齡提供唔同水平嘅津貼喎。

員工薪酬差異大 3位全職月薪低於1萬

問卷調查仲問埋議員聘請嘅員工月薪水平，發現22%全職員工月薪4萬蚊以上，都相當吸引㗎。不過，亦有3位全職員工月薪介乎5,000至10,000蚊，其中一位嘅老細係選委會界別議員，另外兩位嘅老細係功能界別議員。阿絲心諗，月薪低過一萬仲肯做，究竟係愛呀？定係責任呀？

而加薪幅度方面，46.3%員工年度加薪5%以下，23.6%員工加薪5%至10%，只有1.7%可以加薪15%或以上。調查亦發現，議員聘請嘅全職員工流失率屬於偏高水平，2023年達到20.9%，有14位員工就話搵到更高薪嘅職位決定離職。

有議員全職員工流失率87.5%

問卷調查更加顯示，有一位選委會界別議員，2023年全職員工流失率高達87.5%，佢聘請8位員工，有7位都決定唔撈喇！究竟發生咩事呢？認真耐人尋味。而地方選區方面，亦有兩位議員嘅員工流失率達到50%，即係有一半員工離職。面對咁高流失率，相信議員都要諗下點樣「留人才」同「搶人才」喇。

調查亦有問到議員地區辦事處租金水平，但原來有2位議員冇營運任何地區辦事處。睇返區議員嘅「履職監察機制指引」要求上任3個月內要開設辦事處，但立法會議員上任超過兩年都無地區辦事處，似乎講唔過去喎。

建議少於4,999元開支無需單據證明

班議員對claim錢亦有新共識，大部分人對無須憑單據證明，發還「其他一般工作開支」下嘅部分開支表示支持或冇意見，只要金額少過4,999蚊就可以免單claim錢喇。上限定為每年辦事處營運開支償還款額可獲發還嘅最高金額5%。

可憐阿絲買本記者簿都要拎單claim錢，係時候同老細講吓要「完善」claim錢制度喇。