政務SEE｜林琳倡經貿辦「一雞幾味」說好公務員故事 顏汶羽建議成立公務員關愛隊

最近駐倫敦經貿辦捲入「間諜案」風波，民建聯議員林琳今日（20日）喺立法會話，經貿辦應該「一雞幾味」，喺海外做義工，說好香港公務員故事。公務員事務局局長楊何蓓茵話，經貿辦人員用官方、個人身分說好公務員故事，都係佢哋嘅使命。佢提到公務員現實工作「唔係朝9晚5，放工就無嘢喇！」民建聯顏汶羽就建議成立18區公務員關愛隊，不過局長無正面回應。

最近公務員有兩件事成為熱話，一個就係駐倫敦經貿辦行政經理袁松彪涉協助香港情報機構，違反英國《國安法》嘅「境外干預」罪被捕。另一個就係公務員薪酬趨勢淨指標出爐，公務員加薪4.01%至5.47%。

特區政府好關注公務員形象， 立法會今日召開會議，討論推廣公務員義工服務同說好公務員好故事。楊何蓓茵話，港府有超過70個部門成立義工隊，2023年有2.2萬人次參加，義工時數去到8.9萬小時，條數包括退休同現職公務員嘅義工。

民建聯林琳提議經貿辦要喺海外做義工，說好香港公務員正面故事，「佢哋會唔會喺當地都做啲義工服務，令香港形象製造得好呢？我成日覺得花資源、花時間做一啲東西，應該『一雞幾味』」。

葉劉稱經貿辦要留意流亡港人

經貿辦真係好唔得閒，行政會議召集人葉劉淑儀前日（18日）先話，經貿辦嘅性質已經改變，要留意仇華議員、流亡港人喺當地嘅活動。阿絲心諗：如果再抽時間做埋義工，會唔會太忙呢？

楊何蓓茵話，經貿辦人員數目比較少，禮拜六、日都要做推廣工作，「佢哋有冇做義工服務呢，我無資料喺度……無論以官方身分、個人身分喺外地說好香港故事，說好公務員故事，都喺佢哋嘅使命」。局長又話喺大學講解公務員工作時，講返公務員真實工作，「唔係一般好古板印象，朝9晚5放工就無嘢喇！」

民建聯立法會九龍東議員顏汶羽建議，18區各設「公務員關愛隊」，可以同地區關愛隊合作喎。楊何蓓茵話，已經向各部門義工隊傳達關愛隊聯絡方法、服務範疇，鼓勵義工隊聯絡關愛隊。至於搞唔搞「公務員關愛隊」？局長無直接回應喇。

勞工界議員周小松提到新加坡公務員有一日「義工假」，港府會唔會考慮提供假期鼓勵公務員做義工。楊何蓓茵話，做義工都要有啲犧牲，而公務員假期唔輸俾私人機構，「公務員喺假期攞啲時間出嚟，都非常符合做義工服務嘅精神，暫時我哋唔會考慮提供義工假」。