政務SEE〡謝偉俊：區選過分宣傳易淪笑柄 愛國陣營玩晒 政府越谷市民越躺平

上月舉行嘅區議會選舉投票率只有27.54%，成為區選史上最低紀錄。立法會一個小組會議今日（23日）討論選舉嘅宣傳工作。選委界別議員謝偉俊認為，今次選舉「愛國陣營玩晒」，令最少一半香港市民冷感，加上港府過度宣傳帶嚟反效果，「政府越谷，市民越躺平」，呼籲政府日後「適可而止」，以免選舉制度淪為笑柄。

立法會政制事務委員會今日舉行小組會議，討論上月10日舉行嘅區議會選舉宣傳工作。阿絲原本以為事隔個半月，加上特首李家超早已定調「滿意」投票率，一眾愛國愛港議員應該都好滿意。不過，聽聽下，又唔完全係咁喎。

首先發言嘅係社福界議員狄志遠，佢話今次區選投票率未如理想，政府有冇反思係候選人競爭不足，或者係制度問題導致。政制及內地事務局長曾國衞就回應，有好多因素導致投票率高低，又話投票率低過香港「大有地方在」。

何君堯：唔愛國唔愛港嘅人而家唔嚟玩

跟住認為投票率太低嘅係選委界別議員何君堯，佢話：「唔愛國唔愛港嘅人，而家唔嚟玩，呢個係現實嚟」。咦，等等，按照何議員邏輯，即係話唔投票嗰72%選民係唔愛國愛港，所以先唔投票？

佢建議政府唔好淨係靠選舉當年宣傳，重點要喺未來幾年，470名新任議員嘅地區工作，「要做到急民所急，為人民服務，咁就可以……將人心扭轉、拉返嚟，呢個先係主導精神啊嘛！」

何議員嘅發言「感動」另一位選委界別議員謝偉俊，佢發言先承認，「通常我唔係好同意……不過今次我好同意何君堯議員」。佢話政府唔可以「臨急抱佛腳」，應該靠區議員具體工作嚟得到市民支持。佢又話今次選舉可謂「愛國陣營玩晒」，令社會「相當多嘅一部分，無過半都起碼一半市民相對冷感」。

謝偉俊：選舉係嚴肅 否則會令選舉淪為笑柄

謝偉俊進一步解釋，基於現實可能唔能夠過分強調用投票率高低作為成敗指標。佢話如果政府太緊張投票率，過分宣傳帶來反效果，結果「政府越谷，市民越躺平」。佢仲話，原本負責行政工作嘅官員好委屈吓，「用生硬動作、嗌生硬宣傳口號……要佢哋咁做，好多都好委屈咁，有啲就要交差咁做」。

謝偉俊發言多次提到宣傳要「適可而止」，甚至話「選舉始終係嚴肅嘅……否則會令成個（選舉）制度淪為笑柄，甚或令選舉唔夠莊嚴性……令市民反感」。

曾國衞回應嗰陣，坦言「粉墨登場唔係官員特別擅長」，目的是嘗試唔同宣傳方法，讓市民感受政府誠意。佢又認同區議員工作就是最好嘅宣傳。

周浩鼎：香港冇西方國家嘅選舉後遺症

當然，立會為政府護航聲音又點會冇，民建聯周浩鼎發言表示，今次選舉無論宣傳方式同投票率都滿意，又反問「係咪想要『黑暴』、『茅招』……嘅選舉？」佢仲話，留意到今次區選之後，社會冇出現群眾仇視、社會撕裂等等西方國家嘅「選舉後遺症」𠻹。到底係仇視抑或漠視，喺投票率數字前，阿絲只有不忍直視。

會議上，曾國衞非常認同周議員嘅睇法，仲解釋今次區選宣傳以「接地氣」嘅新手法、分階段進行，「睇到個氛圍不斷咁提升……關注度、熱度不斷提升情況下，去到最尾，可以話（以）『高潮式』達致。」阿絲不禁諗，唔知有幾多市民認同27.54%真係叫高潮式？