週一 週二 週三 週四 週五 週六 週日
 12
3456789
10111213141516
17181920212223
24252627282930

謝偉俊臨別吐真言? 稱立法會主席梁君彥「可以大覺瞓」 特首從政經驗不夠警察多

立法會出年就換屆喇,議員謝偉俊早前被《星島日報》點名,話佢發表「政治不正確」言論。但阿Paul似乎無受影響噃,最近出席《光明頂》節目,點評立法會變成人大式議會、主席梁君彥可以大覺瞓。佢仲話特首李家超從政經驗唔夠佢做警察經驗多,唔期望佢做到新加坡總理李顯龍政治上嘅歷練咁話。被問到係咪打算退落嚟?Paul話從政17年可以話「夠皮」,但目前都係言之尚早喎。

《星島日報》專欄「大棋盤」早前指,下屆選舉唔少議員因表現等因素要離任,又指謝偉俊「意興闌珊」。不過,阿絲聽最近《光明頂》節目,阿Paul仲係好活潑,好熱衷去點評時政,連特首、立法會主席都無迴避噃。

佢形容立法會由英國西敏寺式轉向「人大式議會」,主席梁君彥主持會議都輕鬆咗好多,「以前我聽講佢星期二晚有啲忐忑不安,唔知聽日(大會)有咩要發生,而家佢可以大覺瞓,甚或可以安心去馬會,呢個係咪進步我就唔知」。

阿Paul又認為新一批議員無從政經驗,「點解佢哋做到議員?可能就係阿爺欣賞佢哋,一手栽培佢」。佢形容現時議會變成一致讚好、一致贊成,慨嘆香港太多一致性聲音喇,議員唔再提出挑戰,「無人敢問規程問題、無人敢質疑、無人敢挑戰主席」。

謝偉俊:窒阿sir佢緊係嬲你啦

作為大律師阿Paul嘅語言技巧有返咁上下,示範如何「非戰狼式」評論一個人。佢話特首身在高位,「對於一啲批評無以往咁易接受啦」,形容李家超「從政經驗唔夠佢做警察經驗多」。

阿Paul又盡訴心中情,「我心裏面笑,警察阿sir你緊係唔可以窒,窒阿sir佢緊係嬲你啦,但我哋從政永遠都係兜口兜面鬧你都好,都係多謝意見,呢啲我哋都慣咗」。佢話自己唔介意俾特首批評,「佢鬧我無咩所謂,公眾或傳媒去評論邊個啱、邊個錯」。

彈完之後,佢都讚返紀律部隊管治係好叻、好有效率,不過又忍唔住話始終唔係香港人習慣、想見嘅,特別係對於中產、專業人士,建議特首可以參考吓新加坡總理李顯龍政治技巧,點樣連結新加坡人,「我哋唔能夠期望特首做到新加坡李顯龍政治上嘅歷練,但都可以參考吓嘅」。

做惡狗唔係香港應有角色

近年香港喺中美角力下處境比較艱難,阿Paul希望香港唔好次次都做馬前卒,「下下幫阿爺做打手,做惡狗嘅,呢個完全唔係香港應該有嘅角色嚟」。佢慨嘆北京外交語言都無香港咁強硬,如果講啲好重嘅說話,勢令香港無咗國際城市或一國兩制下溫和、中立嘅角色。

究竟香港應該點自處呢?阿Paul話香港不嬲崇優、崇專業,有自己個性、有自己諗法,唔可以過份地做Yes man、Yes sir,「香港人講嘢過咗位,唔等如佢哋反叛要推翻國家,只不過呢種特性係香港成功地方」。佢提醒如果將敢批判嘅人當晒係敵人,只係令中產覺得要去搵新天地。

阿絲都無諗到,阿Paul由以前被指係「西環契仔」,今日竟然被形容係立法會「壞孩子」,真係世道變,無比較就無傷害。佢憶述「西環契仔」花名係社民連黃浩銘改嘅,自己都係一笑置之,仲話「從政有呢種寛容先可以從政!」唔知呢句係講俾邊個聽呢?

謝偉俊在《光明頂》節目稱,自己在立法會做不到「戰狼」的角色。
謝偉俊提醒,港人期望領導人間中要站在香港人的角度,「如果無香港市民,你做呢個香港特首都係無意思嘅,你不如搵個京官落嚟做仲好啦!」

相關文章

熱門文章