政務SEE｜熊貓外交 世界各地還熊貓 租金高飼養貴

近期成日都見熊貓BB啲相，由粉紅色一團，到黑眼圈出現，唔知有幾多人同阿絲一樣，已經有少少熊貓疲勞呢。政府宣布聽日（26日）又有兩隻送嚟喇，熊貓作為一種動物，生存真係唔容易，仲要被人類利用作為「外交工具」，雖然好食好住，但被困籠中，都真係身不由己啊。

「熊貓外交」由來已久，上世紀50年代已開始，中國政府以大熊貓作為「國禮」，贈送畀同中國有外交關係嘅國家，曾經接受過呢份禮物嘅就有差不多20個國家，包括蘇聯、南韓、英國、法國、德國、日本、美國等。

呢邊廂興高采列敲鑼打鼓接收熊貓，世界各地唔同國家就開始紛紛送返啲熊貓返中國噃。例如芬蘭嘅「艾赫泰里動物園」因為養唔起熊貓，所以決定將兩隻熊貓「華豹」同「金寶寶」提前送返中國。兩隻熊貓2018年被送到芬蘭，原本租約15年，但園方話喺大熊貓居住嘅設施上，投資咗超過800萬歐元（約6,900萬港元），每年仲要畀包括租金等費用約150萬歐元（約1,300萬港元），實在養唔起咁話喎，咁又真係幾貴嘅。

愛丁堡兩隻熊貓 用兩億港元

英國嚿年都將兩隻熊貓送返中國，而且仲要係最後兩隻，意味着中英兩國嘅熊貓外交，正式終結。「甜甜」同「陽光」住喺「愛丁堡動物園」，但自從2011年被送到英國後，10年租約再加2年續租，嚿年約滿，而愛丁堡動物園花喺兩隻熊貓身上嘅費用合計高達2,000萬英鎊（約2.1億港元），英國傳媒報道，唔少英國人質疑呢筆巨額花費係咪值得。

美國嘅「阿特蘭大動物園」，亦準備將熊貓家庭一家四口送返中國，預計會喺今年底。繼華盛頓嘅國家動物園嚿年將三隻熊貓還返畀中國後，阿特蘭大呢四隻熊貓亦即將被送返中國，熊貓爸爸「倫倫」同熊貓媽媽「洋洋」1999年被送到美國，當時簽咗25年約，租約今年到期，不過送走嘅就唔止熊貓爸媽，連喺美國出世嘅孖生姊妹都一併送走。

原本無新熊貓赴美，中美熊貓外交就要止步。不過兩個月前就有兩隻新熊貓被送到「聖地牙哥動物園」，中美關係持續良好，阿絲立即鬆返口氣。但呢個「熊貓嶺」入場費都唔平噃，美金92元（約716港元）一位，仲未包動物園入場費。

日本方面，東京「上野動物園」嘅「力力」同「真真」將於今個月底被送返中國，因為兩隻熊貓已經19歲，日本決定將佢哋送返中國養老。嚿年2月和歌山都送走咗3隻熊貓，日本現時只剩6隻熊貓。

香港賽馬會「科水」1.21億元 海洋公園熊貓設施「升呢」

至於香港呢？香港賽馬會噚日就宣布，為迎接新嘅大熊貓，會撥捐超過1.21億元，擴建同提升海洋公園嘅「大熊貓之旅」、「香港賽馬會四川奇珍館」嘅設施，包括增加飄雪系統同園景復修。馬會真係唔話得嘞。

熊貓外交當然就係想維繫中國同各國友好，不過高昂嘅租金同埋龐大嘅飼養費用，就經常成為爭論嘅焦點，甚至令一啲國家卻步。曾有媒體估算，香港每年熊貓飼養費大約1,200萬港元，過去15年就用咗高達1.8億港元。除咗飼養費用，唔少地方都會斥鉅資建造適合熊貓居住嘅熊貓館，例如澳門就用咗約8,700萬港元、丹麥就用1.9億港元。

日本傳媒早前亦報道，向中國租借一對熊貓，一年要畀大約780萬港元，而熊貓嘅所屬權屬於中國，如果生咗BB，到咗兩歲之後就要送返中國，以各國租借數目嚟計，中國每年獲得嘅租金估計超過37億港元，係幾和味嘅。