政務SEE｜新香港人來港一年 唱國歌的次數多過中國幾十年

港府近年力推愛國教育，連「港漂」立法會議員洪雯都有話要講，佢接受《明報》訪問話，政府大張旗鼓做好多「雷聲大雨點小」好似政治正確嘅事，仲以唱國歌為例，話有位「內地朋友」嚟咗香港一年，唱國歌嘅次數仲多過喺中國幾十年。阿絲心諗，當香港比中國更熱唱國歌，算唔算係一種成就呢？

今屆立法會有唔少「港漂」背景嘅議員，當中洪雯嚟咗香港超過20年，睇住香港變遷。佢接受《明報》訪問時承認，而家政治上有「三個香港」，包括深藍、深黃同中間一群，認為政府所做嘅嘢，只係以深藍陣營為對象，忽視咗中間陣營。

洪雯仲話一國兩制終極目標係要人心回歸，但政府就無做好中間陣營嘅工作，喺搞愛國主義教育時，「大張旗鼓去做一些雷聲大雨點小的事情，你做很多事情，好像政治正確……好像唱國歌，他是不是真正從心底裏面感受到對國家的自豪感？」

佢又分享一則故事，有新嚟港一年嘅「內地朋友」笑笑口講，喺香港唱國歌次數多過喺中國幾十年。阿絲好奇，究竟係香港太多機會唱國歌，定係呢位朋友喺中國太少唱國歌呢？洪雯強調香港要同中國城市唔同先有價值，國際化、自由、法治、多元、開放係香港人安身立命嘅根本。

王冬勝：香港繁榮因為擁有國際社區

唔止港漂議員呼籲香港要保持國際化，滙豐銀行主席王冬勝最近接受《城大商學院》雜誌訪問，佢話香港之所以繁榮，係因為擁有國際化嘅社區，有法國人、英國人、加拿大人、印度人等等，香港必須做到東西方互相對話嘅地方，佢反問：「如果香港只係同一個地方對話，多元化又喺邊度？」（the conversation just focuses on one place, where is the diversity? ）

王冬勝話美國之所以強大，因為佢哋創造良好嘅大學環境，有嚟自世界各地嘅學生，有最優秀人才去美國嘅大學讀書，美國人才庫就係嚟自全世界，好多諾貝爾獎得主都唔係美國人，不過佢哋都喺美國做嘢咁解。

佢強調只有香港身處國際舞台，將國際社會最好嘅產品、服務同做法帶返香港時，香港先會對中國有價值，然後中國可以利用香港作為了解世界嘅門戶。

王冬勝建議大學生有機會去吓唔同地方旅行，如果暫時冇機會，就喺大學結識唔同地區、唔同種族嘅人，了解佢哋文化、佢哋國家點做生意。王冬勝亦建議大學生要睇多啲國際新聞，了解唔同國際事件帶嚟嘅影響。

咁國際化嘅思維有幾重要？王冬勝就話滙豐請人會睇呢樣㗎，希望員工有一種探索嘅心態，唔能夠只限於香港，要以客觀方式看待事物。一旦客觀地睇一件事，就能做出更好嘅判斷。