政務SEE｜預算案擬月月放煙花 工聯會都頂唔順 「唔好人做你又做」

聽日（28日）公布財政預算案，幾間傳媒引述消息指，港府諗住斥資過億，月月都放煙花同搞無人機表演。今日阿絲聽電台節目，反對得最激烈竟然係前工聯會副理事長、旅遊聯業工會聯會理事長梁芳遠。佢話月月放煙花會無咗新鮮感，質疑高投資、小回報，更唔客氣炮轟政府「唔好人做你又做」，話家下度度都有無人機、煙花匯演啦。連出名「愛國愛港」嘅工聯會人士都頂唔順，都真係相當罕見。

《星島》今日引述消息人士，為月月放煙花解畫，強調計劃中嘅「煙火」匯演規模無年初二煙花咁大，類似嚿年聖誕節喺西九文化區舉辦嘅「冬日維港水上煙火」匯演，每次大約10分鐘左右。

但工聯會屬會、旅遊聯業工會聯會理事長梁芳遠今朝喺港台節目《千禧年代》，就唔睇好月月放煙花，「煙花同無人機表演唔係香港先有，其實而家度度都有」。佢舉例過去星期六喺珠海斗門區新樓盤裏面一個公園，都做到相當有規模嘅煙花同埋無人機表演。

梁芳遠認為，維港煙花係過年或特別日子先有，咁先有新鮮感，「如果你搞到個個月做一次，呢個新鮮感……我覺得咩嘢都係物以罕為貴，變咗咁樣（維港煙花）嗰個矜貴已經唔存在喇！」

質疑月月放煙花燒錢

港府千億財赤下，梁芳遠都為公帑肉緊，「煙花畢竟係一個燒錢嘅一樣嘢，增加到一個月一次，旅遊市場入面真係有好大嘅吸引力？我真係唔覺得囉！」

佢認為月月放煙花難以吸引長途飛機客，「我哋需要客人嚟嘅係過夜、更加多嘅消費」。而旅行社亦唔會為每月煙花表演設計相應嘅旅行團。與其放煙花燒錢，梁芳遠建議將錢用嚟建立香港特色，例如海濱長廊燈飾夜景、避風塘文化。

梁芳遠講到興起，仲連珠炮發咁批評政府，「我覺得有特色先最重要！唔好人做你又做，依家度度都做緊放無人機呀、咩煙花匯演呀，連一個樓盤都做緊嘅嘢，你香港一個咁大城市，你想吸客又去做呢啲動作嘅話呢，我真係睇唔到佢有幾大嘅刺激令旅客飆升」。

阿絲睇返資料，梁芳遠做過兩屆工聯會副理事長，仲曾經接受過《人民日報》訪問，話「我和同行百分百支持香港國安立法」，今次咁激烈批評政府政策都相當罕見。不過，今屆政府似乎相信「好橋唔怕舊」，例如「夜繽紛」變18區「日夜都繽紛」。今次搞月月放煙花，思路都係相近喎。

市民：香港政府一味跟風

除咗愛國愛港陣營唔欣賞，打上去電台嘅市民都唔睇好月月放煙花。市民陳小姐就話「成日燒煙花搞到香港空氣混濁，又嘥錢。你不如整啲優惠券呀、消費券呀……我覺得香港政府就係，一味人哋做乜，你就跟風做乜，參謀人員好心諗啲新鮮嘅嘢啦！」

不過，香港入境團旅行社協會創會會長謝淦廷就有唔同睇法，佢話印尼、泰國、菲律賓等等嘅東南亞客人，基本上夜晚8點會睇幻彩詠香江，如果加埋無人機表演有幫助，「香港吸引力，我覺得愈嚟愈小，但我覺得呢方面香港政府加強吓，對業界吸引東南亞客呢……係非常非常受歡迎嘅」。