週一 週二 週三 週四 週五 週六 週日
 12
3456789
10111213141516
17181920212223
24252627282930

政務SEE|事隔3年回港 資深傳媒人褚簡寧嘆「我唔認識嘅香港」

今日係國際新聞自由日,資深傳媒人褚簡寧(Michael Chugani)事隔3年返港,日前接受民主黨前主席劉慧卿網上節目《ChatDP》訪問,討論香港仲有冇新聞自由,係咪可以試吓尖銳批評政府?卿姐劈頭一句「試咗無你就大鑊呀!」褚簡寧都苦笑:「你話試吓,邊個夠膽試?」佢又慨嘆香港已經唔係佢以前認識嘅,例如立法會無晒新聞,「如果你個個都舉手(支持),即係無乜新聞價值」。

美籍印裔傳媒人褚簡寧係新聞界老行尊,主持節目、評論時事、教授英文都享負盛名。不過佢喺2021年告別香港,返咗去美國住。事隔3年佢返嚟香港探朋友,短居幾個月,認為香港3年間有唔少變化。

佢慨嘆:「好多人走咗喇,離開咗香港。譬如喺中環行,好多人講普通話,呢啲總之就唔係我認識以前嘅香港!」褚簡寧亦留意到,少咗西方國家嘅遊客嚟香港,「特別美國真係少咗好多,或者佢哋驚咗囉!」佢話香港如果想成為國際城巿,港府要諗方法請西方國家嘅人返嚟。

資深新聞工作者、時事評論員禇簡寧(右)出席卿姐網上節目。 相片:劉慧卿Facebook截圖

做咗幾十年記者,褚簡寧感受最深當然係新聞界。佢形容立法會無晒新聞,兩份主流英文報章無咩立法會報道,「我想跟立法會講緊乜嘢,都無嘅,都無人講」。佢覺得同議員立場一致有關,「如果你個個都舉手(支持),即係無乜新聞價值」。

褚簡寧離開香港時,《國安法》已經實施咗一年,今次重返香港,《基本法》23條亦通過咗。早前律政司司長林定國話,傳媒仍可向政府作出尖銳、嚴厲嘅批評。咁香港仲有冇新聞自由呢?前《南華早報》總編輯王向偉早前講過,新聞自由有定冇,要試吓先知。

不過卿姐對於試一試有憂慮,「試咗無你就大鑊呀!走咗去(監獄)叫我嚟探你!」褚簡寧都有疑問,「你話試吓,邊個夠膽試?」佢認為有時未必係政府唔俾講,可能係報紙老總唔夠膽刊登,「唔係話你無新聞自由,但係夠唔夠膽出呢?係另一回事」。阿絲心諗,如果老總自我審查,新聞自由一定受損啦。

月月煙花好浪費 夜巿同台灣無得鬥

雖然褚簡寧無再寫政治評論文章,但受訪時都忍唔住批評港府月月放煙花,吸引到大陸客,但無咩效果,「(煙花)一個月一次好浪費,時時做就無咗新嘅價值,人哋睇到悶……無人搭飛機從美國嚟香港睇煙花」。佢亦認為香港嘅夜市比唔上台灣,「我喺台灣住咗半年,你啲夜市根本無得同佢鬥!」

褚簡寧語重心長咁講,香港一定要諗啲新嘢出嚟,「好多嘢可以做,但佢就唔識做,呢個真係好可惜囉!」佢又認為要說好香港故事,唔能夠一味唱好,「如果淨係講好,唔講衰,人哋覺得好難接受,你唔可以淨係講好」。資深傳媒人咁真誠講香港現況,睇嚟真係得到網民共鳴喎,訪問影片3日內有近6萬次點擊。

講到尾,究竟香港仲有冇新聞自由?阿絲留意到《華盛頓郵報》編輯部今日刊登一篇評論文章,形容香港除咗《國安法》,仲加埋23條,已經灌輸足夠嘅恐懼同不確定性,令好多記者被嚇倒,佢哋會自我審查避免越界觸犯中共不斷變化嘅「紅線」。

作為傳媒一員,阿絲希望趁國際新聞自由日,為所有努力行使新聞自由嘅行家打打氣,亦希望香港人多多支持好嘅報道,令傳媒盡力履行「第四權」監督政府。

相關文章

熱門文章