政務SEE〡民建聯擬開「小紅書」說好香港故事 規定成員每年北上培訓

公務員、學校教師要北上培訓，連政黨成員都唔例外！立法會第一大黨民建聯噚日（18日）同傳媒茶敘，副主席陳學鋒話會加強內部培訓，要求議員同職員每年北上至少一次。另外，民建聯仲打算開「小紅書」帳戶，要向中國民眾說好香港故事咁話。阿絲聽到民建聯會開小紅書真係興奮到瞓唔着啊！而且仲可能係香港第一個開小紅書嘅政黨𠻹。不過唔知民記會唔會擔心，俾立法會議員謝偉俊話引起「小紅書治港」嘅觀感呢？

民建聯噚日（18日）同多間香港傳媒茶敘，綜合《明報》、《經濟日報》等幾間傳媒報道，民建聯副主席陳學鋒話會加強內部培訓，包括邀請專家學者舉辦「學習講堂」，同定期開國情班等等；又會要求該黨議員、社區幹事同職員，每年去中國參加至少一次培訓。

陳學鋒仲話，民建聯黨內會有系統咁紀錄成員表現，如「參與討論程度、反應是否敏捷」等，希望第日推薦更多人才加入政府，到時就可以將成員嘅「成績表」交俾政府參考喎。如果唔講係加入政府，阿絲仲以為係考大學要交成績表、推薦信咁。

民建聯副秘書長葉文斌就話，未來會積極運用社交媒體，分享區議員嘅日常工作同社區「好人好事」，仲考慮開設「小紅書」帳戶𠻹。不過，小紅書目前都係中國用戶較多，所以就可以用平台「說好香港故事」咁話。

阿絲而家先知，原來民記竟然未有小紅書帳號？咁就可以學吓政務司司長陳國基，同保安局局長鄧炳強嘞。港府高層入面，佢兩位係最先開小紅書帳號，喺小紅書「fans」仲多過佢哋喺Facebook同Instagram嘅followers𠻹啊。唔難理解嘅，fb同IG始終香港人比較常用，中國民眾就要翻牆先用到囉。

截至今日下晝4點，陳司長嘅小紅書有1.2萬個粉絲、1.7萬個按讚收藏；佢嘅fb就有2,000個like、4,000個追蹤。鄧局長就仲受小紅書用戶歡迎，有8萬個粉絲、33.1萬個按讚收藏；佢嘅fb就有3.4萬個追蹤。

會唔會擔心司長、局長「厚此薄彼」，甚至出現「小紅書治港」？唔使擔心嘅，阿絲記得政制及內地事務局局長曾國衞答過謝偉俊議員，「無論是在本地或內地社交媒體提出有關香港的意見，特區政府都同等重視」嘛。