政務SEE〡教育事務委員會討論《施政報告》及35億元撥款 梁美芬想兩個鐘完事 議員質疑後轉軚加會

「完善」後嘅立法會，唔少人覺得係「橡皮圖章」，不過今日（1日）嘅教育事務委員會，阿絲就見到少有一幕。教育委員會主席、經民聯議員梁美芬希望用唔夠兩個鐘嘅會議時間，討論成份《施政報告》有關教育部分，仲想將兩項涉及35億元嘅撥款，一次過討論埋再交上財委會。結果畀多名議員質疑，最後梁美芬決定下周加會，期間仲怪議員「未睇文件」，唔討論有關內容㖭！

立法會教育事務委員會今朝開會，討論《施政報告》關於教育局嘅政策內容，聽個名都知內容唔會少啦，單單教育局畀議員嘅文件已經有14頁共54段，再加4個共27頁嘅附件㖭！教育局長蔡若蓮嘅開場發言就已經讀咗接近12分鐘嘞！

開始討論前，委員會主席梁美芬就講明，政府文件內涉及15億元撥款嘅「專上院校研究配對補助金計劃」，同20億元嘅「教師專業發展基金」，「兩個項目打算今日傾完就直接上財委會，未必等到下一個議程特別又開呢個議題」。另外，佢亦希望議員喺會上傾埋即將提出修訂、涉及全港專上院校嘅《專上學院條例》。

新思維議員狄志遠即時提出規程問題，話「過往撥款有獨立議題都要講一個鐘，今日每人（發言）得4分鐘，又講咁多（內容）」。佢話工務小組之前部分項目會要求財委會不作討論直接表決，佢就提問「（兩項目）交到財委會，喺財委會係咪有得討論？」在場嘅財委會主席陳振英就話，係咪獨立討論議題由委員會決定，但要交上財委會呢，委員會就一定要有表決程序。

跟住就規程問題發言嘅，係本身並非教育事務委員會委員嘅田北辰，心水清嘅佢幫議員計到要傾幾多項議題，「你（梁美芬）而家唔係多咗一項（議題），係多咗三樣嘢，再加埋（討論）《施政報告》」。佢仲話，「你今日問我哋使唔使去財委會，我邊有時間傾啫？係咪？一係你就再搵時間去傾3個items（議題）；一係我覺得必然需要財委會討論，唔應該叫人表唔表態」。

田北辰：係咪程序上出現漏洞 梁美芬：我係主席，我已經裁決咗！

呢個時候，作為主席嘅梁美芬就決定先開始討論，最後交由委員會委員表決係咪交上財委會。但非委員嘅田北辰就話，「如果我認為呢啲事項需要喺財委會傾，因為今日唔夠時間，（但）我又唔係委員，我又冇權舉手，咁係咪程序上出現漏洞呢？」

梁美芬即時拉高聲線，好權威咁話，「我係主席，我已經裁決咗！」佢仲要串議會資歷豐富嘅田議員，「你自己應該知道你自己嘅權利……你做咗咁多年議員」。

拗到呢度，個會已經開咗半個鐘，除左局長嘅開場發言外，實質議題內容仲未開始傾。想當然，個會就傾唔晒所有內容啦。到會議接近結束，原本「企硬」要投票、將項目交到財委會嘅梁美芬改口，決定今日唔投票，下周擇日加會。之但係，又輪到局長有意見。

梁：唔知佢哋係未睇文件吖 定係乜嘢

蔡若蓮話「財委會排期需時」，提出不如先將15億元嘅「專上院校研究配對補助金計劃」排隊先，可惜梁美芬堅持「我決定唔投票就（今日）唔會過㗎啦！」局長再三游說，「即係15億嗰個都去唔到FC（財委會）排隊？……因為去FC排隊需時……」結果畀梁打斷發言「我理解㗎局長！因為你睇到，剛才15億同20億呢，基本上冇一個委員可以作出討論，我唔知佢哋係未睇文件吖，定係乜嘢。所以會喺下禮拜加一個會，下禮拜作出決定」。

就係咁，教育事務委員會最終要加會討論兩項撥款35億元嘅計劃。阿絲就覺得，為公帑把關，加上港府千億財赤當前，議員要時間討論都係理所當然。如果委員會主席一早準備多一個會議時段討論，咪唔使鬧交囉，相嗌唔好口嘛！