政務SEE 給寧波幫的回信｜財爺與港7大商會開學習會 研習近平182字回信

國家主席習近平喺上星期回信畀祖籍寧波嘅香港企業家，主席回信當然要隆重其事啦，香港多個同鄉會喺幾日前已經開座談會，話要學習信中精神咁話。呢股學「習」風氣噚日就延續到港府同商界，財爺陳茂波同香港7大商會喺會展租場，一同研習呢封182字嘅信。阿絲記得，習主席嚿年7月都回信俾某中學嘅學生，結果教育界舉行無數學習會，到上個月「回信一周年」都仲有分享會，今次呢封給「寧波幫」回信，唔知又要開幾多個會呢？

根據《新華社》報道，國家主席習近平喺上周二（7月30日）回信俾「包陪慶、曹其鏞等祖籍寧波的香港企業家」，扣除上款、下款同日期，信中內文只有兩段，共182字。

第一段係表揚在港寧波企業家「傳承優良傳統」，創業之外亦捐助家鄉，詮釋「愛國心、桑梓情」。第二段重申中國致力發展「中國式現代化」，希望商界繼續發揮優勢、主動融入國家改革開放大局，「為實現中華民族偉大復興的中國夢作出新的貢獻」。不過阿絲留意到，除咗上款之外，內文完全冇提「香港」噃。

激動感恩 包陪慶籲港人珍惜國家厚愛

阿絲仔細拜讀呢182字，內容其實同過去中央論調冇大分別。不過，收到主席回信，當然唔可以束之高閣啦。收到回信後兩日，「香港甬港聯誼會」、「香港浙江省同鄉會聯合會」等同鄉社團都舉行座談會。習近平特別點名、已故「船王」包玉剛長女包陪慶仲話，對習嘅回信「不但激動，更是感動和非常感恩」，回信對港人有好大鼓舞，呼籲港人珍惜國家厚愛𠻹。

以為寄信者收到回信就結束？主席的信又點會咁簡單呢，財政司司長陳茂波噚日就同創新科技及工業局局長孫東、中聯辦主任鄭雁雄等喺灣仔會議展覽中心，出席由中華總商會、香港中華廠商會、香港地產建設商會等香港7大商會主辦嘅「香港工商界學習貫徹習近平主席給祖籍寧波的香港企業家重要回信精神座談會」。

《大公報》頭三版詳盡報道座談會

會議名稱雖長，但都唔夠黨報嘅報道篇幅長。《大公報》今日（7日）用咗頭、二、三版嚟報道座談會內容。根據港府新聞公報，財爺喺會上致辭全文超過1,200字，篇幅足足超過習近平回信字數6倍啊！內容仲包括回信冇提過嘅「一國兩制」、國際金融中心、創新科技，同埋「新質生產力」。

翻查紀錄，習近平喺嚿年7月都曾經回信俾香港培僑中學嘅學生，由教育局到學界紛紛舉辦大大小小座談會。到上個月，教育局局長蔡若蓮仲出席「習近平主席回信培僑中學學生一周年」分享會，有400名師生參與。呢封「給寧波幫的回信」，唔知又要開幾多個學習會嘞！