政務SEE｜新加坡《聯合早報》特約記者批立法會議員怠政「表現有如小學生」

香港、新加坡不嬲都係競爭對手，兩個城市嘅經濟、文化、領袖水平成都畀人攞嚟比較，近年香港唔止畀新加坡「搶生意」，連完善咗嘅選舉制度都畀人串，真係「衝出國際」喇。阿絲講緊嘅係《聯合早報》特約記者戴慶成寫咗篇文，批評香港立法會議員怠政，話佢哋「表現有如小學生，連基本的工作態度都沒有」，又歸咎落實「愛國者治港」後，少咗反對派同民意監督，議員往往敷衍了事。

《聯合早報》係新加坡發行量最大的華文報紙，立場一向被視為親建制，亦係為數唔多可以進入中國嘅外國報紙。但噚日《聯合早報》就刊登香港特派員戴慶成一篇文章，盤點新一屆立法會議員嘅水平。

文章一開始就向新加坡廣大讀者介紹，最近有新丁議員出席記者飯局，飯局完結前竟然「借尿遁」，要記者畀錢埋單，至今都無人承認責任，形容事件「一下子打破了立法會議員的尊貴身份光環，也淪為社會連日來的笑話」，事關議員每月都可以申報兩萬蚊應酬費用，但呢位代號「L君」嘅議員竟然「借尿遁」。

戴慶成又話，議員每月過十萬月薪，但一啲議員嘅負面新聞不斷曝光，參與政府法案表決比率低，另一邊廂又「粉墨登場」娛樂公眾，利用議員身份舉辦「立會好聲音」，難怪好多港人都話，對這些「尊貴的議員」再沒有期望。

佢仲有個特別嘅觀察，立法會議員收到有關人士「勸喻」後，又變成積極議政，議員巧合地紛紛出現「馬拉松式」發言，大刷存在感，結果會議開咗近三個鐘，文章直斥係「浪費時間」。

阿絲覺得成篇文最唔留情面係呢段，雖然先讚揚部分議員想方設法為市民服務，不能抹煞，但又話更多係怠政嘅議員，「表現有如小學生，連基本的工作態度都沒有」，堂堂愛國者治港嘅代表，竟然被批評到咁嘅地步，都真係少見喎。

唔知大家仲記唔記得，之前中大校董會改制爭議，立法會議員管浩鳴曾經炮轟中大「連一間幼稚園不如」，點知今次議員就被批評「表現有如小學生」。

而且文章觸及一個核心問題，點解呢班議員會上位？原因就係選舉制度。文章點出以往香港政治人物要經歷長時間社區工作同選舉洗禮先入到議會，但新嘅制度以忠誠為優先考慮，好多新人根本無從政經歷，論政水平一般；又少咗反對派、民意監督，議員只求向北京交差，對社會嘅要求往往敷衍了事。

咁有咩解決方法呢？文章只係強調議會唔應該成為「橡皮圖章」，北京要鞭策議員「做好呢份工」。話時話，「我會做好呢份工」係出自前特首曾蔭權2007年競選連任嘅口號，當時仲畀輿論批評口號係公務員心態，眼界太狹窄，點知10幾年後嘅今日，「做好呢份工」竟然變成對立法會議員嘅期望。

阿絲又發現，呢篇文章原本只係《聯合早報》刊登，但引起台灣嘅《經濟日報》、《聯合報》注意變成報道，結果香港議會故事由新加坡輸出到台灣。

值得留意嘅係，戴慶成唔止係《聯合早報》特約記者，仲有個「香港學研社召集人」嘅頭銜，「香港學研社」官網收錄大批刊登喺建制媒體嘅評論文章，包括《堅料網》、《橙新聞》、《思考香港》等。《思考香港》以往有刊登戴慶成嘅評論文章，唔知呢篇有冇機會喺本地建制媒體轉載呢？