六四、七一 一個公民的悼念  被捕者李盈姿：對得住良心 做力所能及的事

今年6月3日晚，54歲的李盈姿在維園附近悼念六四，被警察以「作出具煽動意圖的作為」拘捕；7月1日她隻身在銅鑼灣出現，被警察盤查後離開。她仍然慣性記得六四、七一的意義，「七一係遊行架我哋，等於六四係要紀念天安門死難者」。朋友勸她不要「送頭」，但她覺得悼念沒有錯，「個個都留得青山在，我覺得唔係咁……我諗我對得住良心囉，做咗我力所能及嘅事」。

六四、七一前，李盈姿的名字很少在傳媒報道出現。她接受《光傳媒》專訪時，有點尷尬地說，「去都係……自己個心唔心息咁樣」。她說，自己並非很刻意走出來表態，「有啲嘢我係盡量去做返囉！譬如去年六四我會行出嚟，去年七一我都有由銅鑼灣行路去政總」。去年她被警察截查後便放行，尚有空間做一個人的悼念和表態。

今年她亦有思考過，提早一日在6月3日悼念六四死難者，以為相對安全，「通常3號無咁緊」，未料卻遇上警察盤查、繼而被捕。她坦言是意料之外，「我咩都無做到，無諗過會拘捕」。被捕一刻難免害怕，「以前你警察在街頭拉人，市民會圍觀，幫你影住，現在沒有了」。

「個個都留得青山在，我覺得唔係咁」

警方以「作出具煽動意圖的作為」罪名拘捕李盈姿，被扣查約32小時，她直至6月5日凌晨才獲准保釋離開，雖暫未被落案起訴，但要定期去警署報到。她說，最大壓力反而來自朋友勸告不要「送頭」，「有時好難令佢哋明白，我覺得有啲嘢係要做囉，係要有人做。個個都留得青山在，我覺得唔係咁！」

但不留「青山」又換來甚麼？李盈姿爽快答：「我諗我對得住良心囉，做咗我力所能及嘅事」。同晚有另外3人被捕，其中行為藝術家三木被警方以「在公眾地方擾亂秩序」罪名拘捕，三木被帶走時高呼：「香港人唔好怕！」

李盈姿是專業人士，獲保釋後如常上班，記者問她，一旦被起訴甚至被判罪成，會影響專業資格嗎？她答：「我都年紀唔細，都唔係好在乎」。那萬一罪成入獄呢？她說：「如果我因為六四被捕、坐監。嘩！係光榮嚟，六四人哋犧牲咁多，天安門母親受苦幾十年。」

7月1日她由維園步行去金鐘政府總部，慣性記住這日的傳統意義，「七一係遊行架我哋，等於六四係要紀念天安門死難者」，當晚她折返銅鑼灣時遇警察截查、搜袋，袋中有幾張寫有字句的A4紙，包括「念」、「想念你」、「起來不要做奴隸的人們」、「那殺身體不能殺靈魂的，不要怕他們」等。

現場警員與上級溝通後，警告她若展示相關物品屬擾亂公眾秩序，問她是否願意乘搭地鐵離開。她想了想，自己正在保釋，決定聽從指示，在警員「伴隨」下離開。她慨嘆，昔日遊行表態實屬平常，「你當七一遊行有幾萬人嘅，而家得返100個（表態）都唔知有冇」。

「我隨時走得，但唔想走囉」

近年中產、專業人士紛紛移民，李盈姿很坦白，「我隨時走得，但唔想走囉！我細個走過，移過民，係好唔開心，離開香港，好掛住好掛住香港，好多嘢放唔低。」

1988年，她正在讀港大，約20歲便跟父母移民紐西蘭，完全沒有興奮感覺，「飛機望落去，淨係得草同羊」、「隻腳第一步踏落外國土地，唔得喇，我要返香港！」她在紐西蘭完成大學學位，考到香港專業資格後，1994年就回流香港生活和工作。

九七香港主權移交予中國，李盈姿翌年跑去中國昆明，協助一間NGO做了2年農村扶貧工作，2005年再去農村扶貧，一留就是4年，「一路覺得想返去服務國家，我大中華膠嚟嘅」。

豆腐渣工程觸發政治覺醒

李盈姿說，以往自己不太關心政治，直到2008年北京舉辦奧運，中國一度開放網禁，她身在中國，驚覺中港兩地看到的汶川地震新聞截然不同，「睇到《明報》、睇到《蘋果》，嘩！點解同《新聞聯播》講嘅嘢咁唔一樣？點解原來有豆腐渣工程？」

自此她開始關注社會公義，2009年結束中國扶貧工作後，趕在5月底返港，參加當年的六四紀念遊行。此後每年參加六四晚會、七一遊行。2016年她獲邀參加「真普選醫生聯盟」，代表競逐特首選委席位，最終成功當選，「我知有啲（港大）同班同學話，『唔好投票畀佢！』」

那次是李盈姿少有見報的時刻，過後一直以小市民身分出席遊行集會。這幾年香港政治環境越趨高壓，公民社會組織崩解，政治人物、社運人士被捕、退隱或流散海外。李盈姿作為小市民也成為被捕一員，她苦笑：「唔知喎，行行吓去咗呢一步」。

李盈姿說，自己信耶穌，信仰的呼召（Calling）讓她堅持為受苦的人發聲，最難熬是看見同行夥伴被政權打壓後，意志消磨、一蹶不振，「自己就好似斷了一隻腳那樣痛，卻仍然要走下去」。

她對自己定位是「做到幾多得幾多」、「做得幾耐得幾耐」，「仲有好多人做緊好多嘢，比我更前。社民連、民間電台，好多已經面對打官司，佢哋做緊仲多啦，只不過我係呢兩日企出嚟」。