週一 週二 週三 週四 週五 週六 週日
1234567
891011121314
15161718192021
22232425262728
293031  

政務SEE〡盛讚公民科中國考察極具建設性 劉智鵬:個個都攞返回鄉證!

香港高中學生必修嘅公民科,喺嚿年開始要求所有學生,必須完成一次中國考察。立法會選委界議員劉智鵬今日(21日)大讚計劃「極度有建設性」,等所有學生都要攞回鄉證,「過去有啲人拒絕攞,去到呢個公民科一推,全部搞掂晒!」聽到議員咁講,阿絲就諗,到底呢個安排係為考察,定係為咗要學生申請回鄉證呢?

公民科全名係「公民與社會發展科」,前身係「通識教育」,現時係香港高中必修科之一。教育局之前要求所有修讀學生,喺高中3年內必須到中國考察一次,變相令全港高中學生至少要去中國一次。局方仲要求學校,要將缺席個案匯報俾法團校董會同局方跟進。

立法會民政及文化體育事務委員會今日開會,民政及青年事務局同教育局總結咗港府推動青年境外實習同交流工作。議員當然一致贊成政府大力推動青年到中國交流啦,其中選委界議員劉智鵬就點名表揚教育局,話公民科嘅規定「人人都要去(中國考察),我覺得係極度有建設性嘅項目,因為個個都攞返個回鄉證啦嘛!」

劉議員仲補充話,「過去有啲人拒絕攞,或者點樣,去到呢個公民科一推,全部搞掂晒!我覺得呢個係好好嘅idea!」個idea好唔好,就留俾讀者判斷。不過,劉議員呢番說話,就好似講到推動公民科中國考察,最大好處就係全部學生都申請回鄉證,而唔係讚考察嘅內容喎。

建議全民考察

劉議員講得興奮,仲建議政府諗多步,「借用公民科呢個想法,點樣可以令到成件事(中國考察)『攤開啲』,人人都譬如由小學到中學,或者係大學畢業後到一段時間,即係人人都會喺一個合理時間裏面,佢都有交流、考察嘅機會,(時間上)攤分佢咁」。

阿絲都好想知道,技術上點樣做到全民考察?係咪規定所有人換成人身份證前,必須到中國考察一次呢?可惜劉議員冇繼續申論,出席嘅官員又冇回應呢一題。

中國與外國交流名額比例 57:1

值得留意嘅係,今日議題雖然寫「青年境外實習和交流」,但討論內容絕大部分環繞中國。選委界議員陸瀚民就話,從文件附表粗略計算,香港青年到中國與國際交流名額,比例大約係10比1,建議加強海外交流。

阿絲就計過數,附表顯示港府14個部門提供嘅交流計劃名額中,去中國嘅名額高達21.2萬個,當中包括教育局5.2萬個公社科考察名額,同埋接近11萬個「學生內地交流計劃」名額。至於去國外交流嘅名額,只有3,100個,即使加埋600個同時去中國同國外嘅計劃名額,以21.2萬比3,700,比例係57:1,遠遠高於陸議員講嘅比例。

另外,議員同官員即使提到海外交流,都主要只係講「一帶一路」沿線國家,只有少數議員提到歐洲地區同聯合國實習計劃。其中民建聯周浩鼎就話,國家主席習近平最近到訪法國同匈牙利,建議政府協助香港團體舉辦到匈牙利嘅交流。阿絲聽完呢次會議,對議員們嘅世界觀都算「可見一斑」嘞。

相關文章

熱門文章